Չինաստանը փորձում է չեզոքացնել Թրամփի մաքսատուրքերը՝ խորացնելով իր դերը համաշխարհային առևտրում

Չինաստանը մտադիր է օգտագործել ԱՄՆ նախագահ Դոնալդ Թրամփի սահմանած մաքսատուրքերը սեփական օգտին՝ վերաձևավորելով միջազգային առևտրի կառուցվածքը և նվազեցնելով Վաշինգտոնի ճնշման ազդեցությունը։ Reuters-ի հետաքննության համաձայն՝ Պեկինը փորձում է ստեղծված անորոշությունը վերածել հնարավորության՝ ավելի խոր ինտեգրվելով աշխարհի խոշոր տնտեսական բլոկներին, այդ թվում՝ Եվրամիությանը և Պարսից ծոցի երկրներին։

Չինաստանը նպատակ ունի արագացնել մոտ 20 նոր առևտրային համաձայնագրերի կնքումը՝ չնայած աճող մտահոգություններին՝ գերհ արտադրության, շուկաների անհավասար հասանելիության և ներքին պահանջարկի թուլության վերաբերյալ։ Հունվարին Կանադայի վարչապետ Մարկ Քարնիի Պեկին կատարած այցի ընթացքում ձեռք բերված պայմանավորվածությունը, որով կտրուկ նվազեցվում են չինական էլեկտրամոբիլների մաքսատուրքերը, դիտարկվում է որպես ԱՄՆ ազդեցությունը թուլացնելու ուղղությամբ առաջին քայլերից մեկը։

Միաժամանակ չինացի դիվանագետները ակտիվորեն աշխատում են տարբեր տարածաշրջաններում՝ կոչ անելով գործընկերներին պաշտպանել բազմակողմ առևտրային համակարգը։ Պեկինի նպատակը Չինաստանը գլոբալ առևտրում այնքան խոր ինտեգրելն է, որ գործընկեր երկրները չկարողանան խզել այդ կապերը՝ ԱՄՆ ճնշման ներքո։ Եվրոպական կենտրոնական բանկի տվյալներով՝ ԱՄՆ մաքսատուրքերը դեռևս չեն հանգեցրել չինական արտահանման կտրուկ աճի դեպի ԵՄ, սակայն չինական ընկերությունները ակտիվացրել են իրենց ներկայությունը Ասիայի, Աֆրիկայի և Լատինական Ամերիկայի շուկաներում։