The Telegraph․ Ժնևում ԱՄՆ-ի և Մեծ Բրիտանիայի ներկայացուցիչները քննարկել են Ռուսաստանը

Ժնևում InterContinental հյուրանոցում ԱՄՆ-ի և Մեծ Բրիտանիայի ներկայացուցիչները փակ հանդիպման ընթացքում քննարկել են Ռուսաստանին առնչվող հարցեր։ Այս մասին գրում է The Telegraph-ը՝ նշելով, որ թերթի լրագրող Ջո Բարնսին հաջողվել է մասամբ լսել զրույցը։

Պարբերականի տվյալներով՝ Մեծ Բրիտանիայի վարչապետ Քիր Սթարմերի անվտանգության հարցերով խորհրդական Ջոնաթան Փաուելը հանդիպել է ԱՄՆ նախագահի հատուկ ներկայացուցիչ Սթիվ Ուիթքոֆի և ԱՄՆ բանակի նախարար Դենիել Դրիսկոլի հետ։ Հանդիպումը տեղի է ունեցել այն նույն հյուրանոցում, որտեղ ավելի ուշ անցկացվել են Ուկրաինայի հարցով բանակցությունները։

Լրագրողի փոխանցմամբ՝ Ուիթքոֆը և Փաուելը քննարկել են ուկրաինական հակամարտության կարգավորման շուրջ սպասվող բանակցությունների փուլը։ Զրույցի ընթացքում Ուիթքոֆը հնչեցրել է «Ռուսաստանը ոչ մի դեպքում...» արտահայտությունը, սակայն շարունակությունը լսել չի հաջողվել։ Փետրվարի 17-18-ին Ժնևում փակ ձևաչափով կայացել էին Ռուսաստանի, ԱՄՆ-ի և Ուկրաինայի եռակողմ բանակցությունները, որոնք առաջին օրը տևել էին 4,5 ժամ, իսկ երկրորդ օրը՝ շուրջ երկու ժամ։