Պլեխանովի անվան ​​համալսարանում տեղի է ունեցել աշխատանքային ժողով՝ նվիրված համալսարանի 119-ամյակին

Գ․Վ․ Պլեխանովի անվան Ռուսաստանի տնտեսագիտական համալսարանի Երևանի մասնաճյուղում կայացավ աշխատանքային ժողով՝ նվիրված համալսարանի 119-ամյակին։

Տեղի ունեցավ աշխատակազմի հանդիսավոր ժողով՝ նվիրված համալսարանի հիմնադրման 119-ամյակին։

 Մասնաճյուղի տնօրեն, պատմական գիտությունների թեկնածու, ՌԴ կրթության ոլորտի պատվավոր աշխատող Թամարա Ռազմիկի Վարդանյանը շնորհավորեց աշխատակիցներին և ներկայացրեց վերջին հինգ տարիների գործունեության ամփոփ արդյունքները։ Ներկայացման ընթացքում ընդգծվեցին հիմնական ձեռքբերումները՝

• ընդունելության կայուն աճ,

• նոր լիցենզիաների ստացում,

• մագիստրոսական ծրագրերի բացում,

• ներդրումային ծրագրի իրականացում,

• ինժեներական լաբորատորիայի գործարկում,

• գիտական ժողովածուի ընդգրկում ԲՈԿ–ի ցանկում,

• ակտիվ գործունեություն մեդիադաշտում, ինչպես նաև այլ կարևոր հաջողություններ։

Նշվեցին նաև ռազմավարական առաջնահերթությունները՝ ուղղված մասնաճյուղի հետագա զարգացմանն ու ամրապնդմանը՝ որպես պլեխանովյան մեծ ընտանիքի անբաժանելի մաս։

 Առանձնահատուկ անդրադարձ կատարվեց ուսանողների հաջողություններին՝ օլիմպիադաներում հաղթանակներին և կարևոր նախագծերին մասնակցությանը, որոնք հնարավոր են դառնում դասախոսների բարձր պրոֆեսիոնալիզմի և ուսուցանման շնորհիվ։

 Տնօրենի շնորհակալագրերով բարձր պրոֆեսիոնալիզմի, մանկավարժական գործունեությանը նվիրվածության, ինչպես նաև ակադեմիական միջավայրի զարգացման և մշակութակրթական ծրագրերի իրականացման գործում ունեցած նշանակալի ավանդի համար պարգևատրվեցին դասախոսներ Ազատուհի Ռուդիկի Բարսեղյանը, Էլբիս Բարսեղի Պեպլոզյանը, Զարուհի Գևորգի Հայրյանը, Վահե Գագիկի Ավետիսյանը և Արեւ Հարությունի Խաչատրյանը։

 Համալսարանի ռեկտոր Իվան Վասիլի Լոբանովի անունից պատվոգրեր հանձնվեցին Ուսումնական-մեթոդական բաժնի ղեկավար Սյուզաննա Ռադիկի Բաղդասարյանին, Մարքեթինգի և տեղեկատվական-վերլուծական գործունեության բաժնի ղեկավար Նաիրա Էդվինի Սարգսյանին, ինչպես նաև 2025 թվականի ընդունելության պատասխանատու քարտուղար Գոհար Գավրուշի Սարգսյանին՝ մասնաճյուղի զարգացման գործում ունեցած բարձրակարգ աշխատանքի և ներդրման համար։

 «119 տարիները տնտեսական կրթության ոլորտում առաջնորդության պատմություն են և հավատարմություն «Լինել, այլ ոչ թե թվալ» նշանաբանին։ Պլեխանովցիների համար սա պարզապես խոսքեր չեն, այլ ամենօրյա պատասխանատվություն՝ հանուն արդյունքի։ Երևանի մասնաճյուղը շարունակում է պահպանել համալսարանի ավանդույթները և ամրապնդել իր դիրքերը Հայաստանի կրթական տարածքում», — նշեց տնօրեն Թամարա Ռազմիկի Վարդանյանը։

 Գ․Վ․ Պլեխանովի անվան Ռուսաստանի տնտեսագիտական համալսարանն ավանդույթների, զարգացման և վստահ առաջընթացի խորհրդանիշ է։ Շնորհավորում ենք մեր մեծ պլեխանովյան ընտանիքին և միասին շարունակենք ճանապարհը դեպի նոր բարձունքներ։