Մի շարք երկրներ պատրաստակամություն են հայտնել զորք ուղարկել Գազա՝ աջակցելու նոր կայունացման ծրագրին

Ինդոնեզիան, Մարոկկոն, Ղազախստանը, Կոսովոն և Ալբանիան պատրաստակամություն են հայտնել զորախմբեր ուղարկել Գազա՝ նախատեսվող Միջազգային կայունացման ուժի կազմում։ Ինչպես հաղորդում է Al Jazeera-ն, նախաձեռնությունը ներկայացվել է ԱՄՆ նախագահ Դոնալդ Թրամփի «Խաղաղության խորհրդի» նիստի ընթացքում։

Նշվում է, որ Ինդոնեզիան կարող է տրամադրել մինչև 8 հազար զինծառայող՝ ընդգծելով, որ առաքելությունը կունենա հումանիտար բնույթ և չի ներառի մարտական գործողություններ։ Ղազախստանը պատրաստվում է ուղարկել նաև բժշկական ստորաբաժանումներ, Մարոկկոն՝ ոստիկաններ, իսկ Եգիպտոսն ու Հորդանանը կմասնակցեն ոստիկանների վերապատրաստմանը։

Միաժամանակ իրավապաշտպան կազմակերպությունները, այդ թվում՝ «Amnesty International»-ը, մտահոգություն են հայտնել նախաձեռնության հնարավոր հետևանքների վերաբերյալ։