ԱՄՆ նախագահ Դոնալդ Թրամփը մարտի 31-ից ապրիլի 2-ը կայցելի Չինաստան

ԱՄՆ նախագահ Դոնալդ Թրամփը մարտի 31-ից ապրիլի 2-ը կայցելի Չինաստան՝ բանակցելու Չինաստանի նախագահի հետ։ Ինչպես հաղորդում է Reuters-ը, այցի մասին Սպիտակ տունը հայտարարել է այն օրը, երբ ԱՄՆ Գերագույն դատարանը չեղարկել է Թրամփի կողմից սահմանված մի շարք համատարած մաքսատուրքեր՝ նրան պատճառելով լուրջ քաղաքական պարտություն։

Սպասվում է, որ Պեկինում կայանալիք բանակցությունների առանցքում կլինի երկու երկրների միջև ձեռք բերված առևտրային հրադադարի երկարաձգումը։ Սակայն դատարանի որոշումը նոր անորոշություններ է ստեղծել ԱՄՆ-Չինաստան հարաբերություններում։ Մասնավորապես, դատարանը որոշել է, որ Թրամփը գերազանցել է իր լիազորությունները՝ Միջազգային արտակարգ տնտեսական լիազորությունների մասին օրենքի (IEEPA) հիմքով Չինաստանի նկատմամբ սահմանելով 20% մաքսատուրք։

Վերլուծաբանների կարծիքով՝ դատարանի որոշումը կարող է թուլացնել Վաշինգտոնի դիրքերը Պեկինի աչքում։ Միևնույն ժամանակ, Չինաստանը շահագրգռված է պահպանել հարաբերությունների կայունացման ընթացքը և խուսափել նոր սրացումներից։ Նախատեսվում է, որ հանդիպման ընթացքում կքննարկվեն նաև Թայվանին ԱՄՆ զենքի մատակարարումները և Չինաստանի կողմից ամերիկյան սոյայի հնարավոր լրացուցիչ գնումները։