Ռուսաստանում արձագանքել են Ուկրաինայի հարձակմանը Ուդմուրտիայի վրա՝ 1400 կմ խորքում

Ռուսաստանի Դաշնության խորհրդի միջազգային հարաբերությունների հանձնաժողովի նախագահ Գրիգորի Կարասինը մեկնաբանել է Ուկրաինայի զինված ուժերի կողմից Ուդմուրտիայի վրա իրականացված անօդաչու հարձակումը՝ հայտարարելով, որ դա Կիևի «կանխամտածված ռազմավարությունն» է՝ հարվածներ հասցնելու Ռուսաստանի ներքին շրջաններին։ Նրա խոսքով՝ նման գործողություններով Ուկրաինան փորձում է ցույց տալ, որ «չի հանձնվում» և չի ձգտում խաղաղ կարգավորմանը։

Կարասինը նշել է, որ, իր գնահատմամբ, Կիևը ռազմականորեն պաշտպանում է իր դիրքորոշումները և չի ցանկանում խաղաղ լուծում։ Նա նաև ընդգծել է, որ Ռուսաստանի քաղաքացիների շրջանում նման գործողությունները առաջացնում են մերժում և անհասկացողություն, ինչպես նաև քննադատություն այն եվրոպական երկրների նկատմամբ, որոնք աջակցում են Կիևին քաղաքական ու ռազմական հարթակներում։

Փետրվարի 21-ի գիշերը Ուդմուրտիան, որը գտնվում է Ուկրաինայի սահմանից մոտ 1400 կիլոմետր հեռավորության վրա, ենթարկվել է անօդաչու թռչող սարքերի հարձակման։ Հարձակման հետևանքով վիրավորվել է 11 մարդ․ երկուսը հոսպիտալացվել են միջին ծանրության վիճակում, մեկը՝ ծանր, իսկ մնացածները բժշկական զննումից հետո տեղափոխվել են ամբուլատոր հսկողության։