Փորձագետը զգուշացնում է․ սմարթֆոնները շուրջօրյա հետևում են օգտատերերին

Սմարթֆոնները մշտապես հավաքում են իրենց տերերի մասին տվյալներ՝ ձևավորելով մանրամասն թվային դիմանկար։ Այս մասին «Լենտա.ռու»-ին տված հարցազրույցում հայտարարել է «Կոդ անվտանգություն» ընկերության ծրագրային արտադրանքների փորձագետ Մաքսիմ Ալեքսանդրովը՝ ներկայացնելով, թե ինչպես կարելի է նվազեցնել վերահսկողությունը։

Նրա խոսքով՝ առաջին հերթին պետք է ուշադրություն դարձնել տեղորոշման կարգավորումներին։ Android համակարգով սարքերում անհրաժեշտ է «Google» բաժնում անջատել տեղադրության հետևումը, իսկ iPhone-ներում՝ «Գաղտնիություն և անվտանգություն» ենթաբաժնում սահմանափակել տեղորոշման հասանելիությունը՝ այն թողնելով միայն քարտեզների և եղանակի հավելվածների համար «Օգտագործման ընթացքում» տարբերակով։ Փորձագետը նշել է, որ Google-ը լռելյայն պահպանում է օգտատիրոջ տեղաշարժերի պատմությունը, ինչը կարող է օգտագործվել ինչպես գովազդային, այնպես էլ այլ նպատակներով։

Ալեքսանդրովը հավելել է, որ Google և Apple ընկերությունները պահպանում են նաև որոնումների, այցելությունների և հավելվածների օգտագործման պատմությունը։ Նա խորհուրդ է տվել Android-ում անջատել «Հավելվածների և վեբ որոնման պատմությունը», ջնջել արդեն կուտակված տվյալները և վերակայել գովազդային նույնացուցիչը։ iPhone օգտատերերին առաջարկվում է անջատել «Հավելվածներին հետևման հարցում թույլ տալ» գործառույթը և հրաժարվել անհատականացված գովազդից։ Նրա գնահատմամբ՝ յուրաքանչյուր սմարթֆոն ունի եզակի գովազդային նույնացուցիչ, որի միջոցով ալգորիթմները հետևում են օգտատիրոջ վարքագծին տարբեր հարթակներում։