Axios․ Վաշինգտոնը քննարկում է Իրանի գերագույն առաջնորդի հնարավոր ոչնչացման սցենարը

ԱՄՆ-ում քննարկվում է Իրանի գերագույն առաջնորդ այաթոլլա Ալի Խամենեիի և նրա որդու՝ Մոջթաբայի հնարավոր ոչնչացման տարբերակը։ Այս մասին հայտնում է Axios պորտալը՝ հղում անելով Սպիտակ տան ղեկավարի անանուն խորհրդականին։ Աղբյուրի փոխանցմամբ՝ սցենարներից մեկը նախատեսում է Խամենեիի, նրա որդու և մի շարք հոգևոր առաջնորդների վերացում, սակայն վերջնական որոշումը դեռ չի ընդունվել։

Axios-ի մեկ այլ աղբյուրի տվյալներով՝ համապատասխան պլանը նախագահ Դոնալդ Թրամփին ներկայացվել է մի քանի շաբաթ առաջ։ Ավելի վաղ The Wall Street Journal-ը գրել էր, որ Թրամփը չի բացառել Իրանի նկատմամբ սահմանափակ նախնական հարվածի իրականացումը, իսկ Թեհրանի կողմից ուրանի հարստացումից հրաժարվելու դեպքում Վաշինգտոնը կարող է անցնել լայնածավալ ռազմական գործողությունների։ ԶԼՄ-ները նաև հաղորդել են, որ ԱՄՆ-ը Մերձավոր Արևելք է տեղափոխել ավելի քան 50 կործանիչ և երկու ավիակիրային խմբավորում։

Լարվածությունը սրվել է այն բանից հետո, երբ Թրամփը պահանջել է Իրանից համաձայնագիր, որը բացառի միջուկային զենքի առկայությունը։ Թեհրանը պնդում է, որ ունի խաղաղ նպատակներով ուրանի հարստացման իրավունք։ Փետրվարի սկզբին կողմերը բանակցություններ են անցկացրել Օմանում՝ փորձելով մշակել համաձայնագրի սկզբունքներ, սակայն Վաշինգտոնը նախազգուշացրել է, որ համաձայնությունից հրաժարվելու դեպքում կանցնի գործողությունների «երկրորդ փուլին», որը, նախագահի խոսքով, կլինի «շատ ծանր» Իրանի համար։