Mash․ Պոլինա Գագարինան կուտակել է 10 մլն ռուբլու հարկային պարտք

Ռուս երգչուհի Պոլինա Գագարինան 10 միլիոն ռուբլի պարտք ունի Դաշնային հարկային ծառայությանը։ Այս մասին հայտնում է Mash Telegram-ալիքը՝ նշելով, որ պարտքի պատճառով կարող են արգելափակվել երգչուհուն առնչվող երեք ընկերությունների հաշիվները։

Խոսքը վերաբերում է «Պոլինա Գագարինա», «Գագարաէվենթ» և «Ջեյսի-Գագարակոմ» ընկերություններին։ Հաղորդվում է, որ 2024 թվականին այս երեք կազմակերպությունները միասին ապահովել են շուրջ 450 միլիոն ռուբլու շրջանառություն։ Դրանք գործում են պարզեցված հարկման համակարգով։

Mash-ը նաև ուշադրություն է հրավիրել այն հանգամանքի վրա, որ ընկերությունները ֆորմալ առումով բաժանված են, սակայն զբաղվում են համանման գործունեությամբ՝ կատարողական արվեստով, ինչը կարող է հարկային մարմինների մոտ առաջացնել բիզնեսի հնարավոր մասնատման կասկածներ։ Ավելի վաղ հաղորդվել էր, որ «Little Big» խմբի մենակատար Իլյա Պրուսիկինը ևս հարկային պարտք ունի՝ 55 հազար ռուբլու չափով։