Կանխիկի փոխարեն կրիպտո․ միլենիալներն ու Gen Z-ը փոխում են ֆինանսական խաղի կանոնները

ԱՄՆ-ում աճում է այն երիտասարդների թիվը, ովքեր հրաժարվում են ավանդական վճարման եղանակներից և նախընտրում են կրիպտոարժույթներ։ Նյու Յորքում աշխատող 30-ամյա Քեյլա Տրիվիերին, օրինակ, առօրյա գնումներից մինչև ճանապարհորդական ծախսեր վճարում է կրիպտոով՝ օգտագործելով Visa քարտեր, որոնք կապված են իր թվային ակտիվների հետ։ Նա ներդրումներ է կատարում բիթքոյնում և էթերիումում, իսկ վճարումների համար օգտվում է առցանց նեոբանկից, որը կրիպտոարժույթը փոխակերպում է դոլարին համարժեք ստեյբլքոյնի։

Տրիվիերին նշում է, որ իր սերունդը ստիպված է ավելի ստեղծագործ մոտենալ ֆինանսներին՝ տնտեսական փոփոխվող պայմաններում։ Հետազոտությունների համաձայն՝ Gen Z-ի ներկայացուցիչների 42 տոկոսը և միլենիալների 34 տոկոսը արդեն օգտագործել են ստեյբլքոյններ։ Միլենիալների զգալի մասը կրիպտոն կիրառում է ճանապարհորդությունների և խոշոր գնումների համար, իսկ Gen Z-ի շրջանում այն տարածված է խաղերի, նվերների և առօրյա ծախսերի նպատակով։

Ֆինանսական խորհրդատուները նշում են, որ կրիպտոարժույթները կարող են դառնալ ակտիվների դիվերսիֆիկացման և գնաճից պաշտպանվելու գործիք, սակայն ընդգծում են բարձր ռիսկայնությունը։ Մասնագետները խորհուրդ են տալիս ներդնել միայն այն գումարը, որի հնարավոր կտրուկ արժեզրկումը ներդրողը պատրաստ է ընդունել։