«Խնդիր չէր լինի», եթե Իսրայելը ընդլայնվեր Մերձավոր Արևելքում. ԱՄՆ դեսպան

ԱՄՆ-ի դեսպան Մայք Հաքաբին հայտարարել է, որ դեմ չէր լինի, եթե Իսրայելը վերահսկեր Մերձավոր Արևելքի մեծ մասը։ Tucker Carlson-ին տված հարցազրույցում, անդրադառնալով «Նեղոսից մինչև Եփրատ» տարածքին վերաբերող աստվածաշնչյան մեկնաբանությանը, Հաքաբին ասել է. «Խնդիր չէր լինի, եթե նրանք վերցնեին ամբողջը»։ Ավելի ուշ նա նշել է, որ իր խոսքը «մի փոքր հիպերբոլա» էր, սակայն չի բացառել տարածքային ընդլայնման հնարավորությունը, եթե Իսրայելը պատերազմում հաղթի և գրավի այդ տարածքները։

Հաքաբիի հայտարարությունները հնչում են միջազգային իրավունքի հիմնարար սկզբունքների ֆոնին, որոնք արգելում են ուժով տարածքների զավթումը։ 2024 թվականին Արդարադատության միջազգային դատարանը Իսրայելի կողմից պաղեստինյան տարածքների օկուպացիան ճանաչել էր անօրինական։ Չնայած դրան՝ Իսրայելը շարունակում է վերահսկել նաև Սիրիայի Գոլանի բարձունքները, իսկ ԱՄՆ-ը միակ պետությունն է, որը ճանաչում է այդ տարածքի նկատմամբ Իսրայելի ինքնիշխանությունը։

Դեսպանը նաև քննադատել է Միջազգային քրեական դատարանին և Արդարադատության միջազգային դատարանին՝ պնդելով, թե դրանք «դարձել են անհավասար կիրառման կազմակերպություններ»։ Միաժամանակ, Հաքաբին քննադատության է արժանացել նաև այն բանի համար, որ իր դեսպանության ընթացքում հանդիպել է դատապարտված լրտես Ջոնաթան Փոլարդին, որը ԱՄՆ-ի գաղտնի տեղեկատվություն էր փոխանցել Իսրայելին։ Նա հայտարարել է, որ չի զղջում այդ հանդիպման համար։