Չինաստանը մշակում է նոր սերնդի միջուկային զենք

ԱՄՆ-ի հետախուզական ծառայությունները ենթադրում են, որ Չինաստանը մշակում է նոր սերնդի միջուկային զենք և վերջին տարիներին առնվազն մեկ գաղտնի փորձարկում է իրականացրել՝ իր զինանոցը արդիականացնելու շրջանակներում։ Այս մասին CNN-ին հայտնել են աղբյուրներ, որոնք ծանոթ են ամերիկյան հետախուզության գնահատականներին։

Նրանց տվյալներով՝ Վաշինգտոնում կարծում են, որ Պեկինը մշակում է հրթիռներ, ինչպես նաև փոքր հզորության տակտիկական միջուկային զենք, որը կարող է կիրառվել, մասնավորապես, Թայվանի շուրջ հնարավոր հակամարտության դեպքում։

Աղբյուրների խոսքով՝ 2020 թվականին Լոբնորում իրականացված, ամերիկյան կողմի կարծիքով, միջուկային պայթյունի վերլուծության արդյունքում հավաքված տվյալները հիմք են տվել եզրակացնելու, որ փորձարկման նպատակը նոր սերնդի միջուկային զենք ստեղծելն է եղել։

Վաշինգտոնում նաև ենթադրում են, որ փորձարկումները վերսկսելու պատճառներից մեկը կարող է լինել այն, որ Չինաստանը չունի բավարար գործնական տվյալներ միջուկային զենքի կիրառման վերաբերյալ։ «Նրանք ունեն բոլորովին նոր սերնդի զենք, որի համար համապատասխան տվյալների բազա չունեն», — նշել է CNN-ի աղբյուրներից մեկը։

Պենտագոնը հայտարարել է, որ չի մեկնաբանում ենթադրյալ միջուկային փորձարկումների վերաբերյալ հետախուզական գնահատականները։ Իսկ Վաշինգտոնում Չինաստանի դեսպանության ներկայացուցիչ Լյու Պենյույը ասել է, որ ԱՄՆ-ը «խեղաթյուրում և սևացնում է Չինաստանի միջուկային քաղաքականությունը»։

Նրա խոսքով՝ սա «քաղաքական շահարկում է, որն ուղղված է միջուկային գերակայության հասնելուն և սեփական միջուկային ապառազմականացման պարտավորություններից խուսափելուն»։ Նա նաև ընդգծել է, որ Չինաստանը կտրականապես մերժում է նման հայտարարությունները և Չինաստանի կողմից միջուկային փորձարկումներ իրականացնելու մասին ԱՄՆ-ի պնդումները «լիովին անհիմն են»։