Իրանի գերագույն առաջնորդը պատրաստվում է իր հնարավոր սպանությանը

Իրանի գերագույն առաջնորդ Ալի Խամենեին հրամայել է մշակել գործողությունների ծրագիր իր սպանության և ԱՄՆ-ի հետ ռազմական հակամարտության ժամանակ երկրի կառավարման համակարգի հնարավոր խափանման դեպքում։

Այս մասին հայտնել է The New York Times-ը՝ հղում անելով Իրանի վեց բարձրաստիճան պաշտոնյաների և Իսլամական հեղափոխության պահապանների կորպուսի ներկայացուցիչների։

Ըստ թերթի՝ Խամենեին որոշակի լիազորություններ է վերապահել վստահելի անձանց նեղ շրջանակին և հրամայել է ստեղծել բազմաշերտ իրավահաջորդության համակարգ ռազմական և քաղաքացիական ղեկավարությունում։ Առաջնորդներին հանձնարարվել է Գերագույն առաջնորդի հետ կապի խզման կամ նրա մահվան դեպքում ընտրել մինչև չորս պոտենցիալ տեղակալների։

Նա կարևոր որոշումների համակարգումը վստահել է խորհրդարանի նախկին խոսնակ և Գերագույն ազգային անվտանգության խորհրդի քարտուղար Ալի Լարիջանիին։ Ըստ NYT-ի՝ վերջին ամիսներին նրա ազդեցությունն աճել է. նա է վերահսկում ներքին անվտանգության հարցերը, դաշնակիցների հետ կապերը և մասնակցում Վաշինգտոնի հետ միջուկային ծրագրի շուրջ բանակցություններին։

Իսրայելի հետ վերջին լարվածության ժամանակ Գերագույն առաջնորդն ընտրել էր երեք պոտենցիալ իրավահաջորդների, սակայն նրանց անունները չեն բացահայտվում։ Լարիջանին ինքը ներառված չէ այդ ցուցակում, քանի որ կրոնական գործիչ չէ։