Գրենլանդիայի վարչապետը մերժել է ԱՄՆ նախագահ Դոնալդ Թրամփի առաջարկը՝ հորդորելով հարգալից երկխոսություն

Գրենլանդիայի վարչապետ Յենս-Ֆրեդերիկ Նիլսենը մերժել է ԱՄՆ նախագահ Դոնալդ Թրամփի առաջարկը՝ կղզի ուղարկել լողացող հոսպիտալ՝ հորդորելով Վաշինգտոնին «սոցցանցերում պատահական մեկնաբանություններ» անելու փոխարեն երկխոսություն սկսել, գրում է Sputnik International-ը։

Թրամփը հայտարարել էր, թե հիվանդանոցը «արդեն ճանապարհին է»։ Սակայն դանիական DR հեռարձակողը հաղորդել է, որ Կոպենհագենը տեղյակ չէ նման ծրագրերից, իսկ պաշտպանության նախարար Տրոելս Լունդ Պոուլսենը նշել է, որ արտաքին օգնության կարիք չկա։

Նիլսենը շեշտել է, որ Գրենլանդիայում գործում է անվճար հանրային առողջապահական համակարգ՝ ի տարբերություն ԱՄՆ-ի, և հավելել, որ պատրաստ են համագործակցության, բայց ակնկալում են հարգալից երկխոսություն։

Դանիայի վարչապետ Մետտե Ֆրեդերիկսենն էլ ընդգծել է, որ հպարտ է ապրել մի երկրում, որտեղ բոլորն ունեն առողջապահական ծառայություններից հավասար և անվճար օգտվելու իրավունք, ինչը գործում է նաև Գրենլանդիայում։