Իրավունքի իշխանությունը նահանջում է ուժի իշխանության առջև․ ՄԱԿ-ի գլխավոր քարտուղար

Մարդու իրավունքները աշխարհի տարբեր մասերում ծանր ճնշման տակ են, հայտարարել է ՄԱԿ-ի գլխավոր քարտուղար Անտոնիո Գուտերեշը՝ նշելով միջազգային իրավունքի խախտումները և քաղաքացիական բնակչության ծանր կորուստները Սուդանում, Գազայում և Ուկրաինայում։

«Իրավունքի իշխանությունը նահանջում է ուժի իշխանության առջև», – ասել է Գուտերեշը Ժնևում Մարդու իրավունքների խորհրդի  բացման նիստում: Նա ընդգծել է, որ անդամ պետությունները չպետք է մարդու իրավունքները դիտարկեն ընտրովի՝ վերցնելով միայն այն սկզբունքները, որոնք իրենց ձեռնտու են։

Գուտերեշը պաշտպանել է ՄԱԿ-ի մարդու իրավունքների համակարգը, որը ներկայում «ճգնաժամի մեջ» է՝ ֆինանսավորման կրճատումների, որոշ փորձագետների վրա հարձակումների և ԱՄՆ-ի կողմից կարևոր միջազգային մեխանիզմներից դուրս գալու պատճառով։ «Մարդասիրական կարիքները աճում են, իսկ ֆինանսավորումը նվազում է», – ասել է նա:

ՄԱԿ-ի մարդու իրավունքների գրասենյակը ճգնաժամի առջև է կանգնած՝ հիմնականում ԱՄՆ-ի և մի շարք այլ երկրների ֆինանսավորման կրճատումների հետևանքով: ՄԱԿ-ի խոսնակի տեղեկացմամբ՝ փետրվարին Վաշինգտոնը մարել է ավելի քան 4 միլիարդ դոլար պարտքի միայն մոտ 160 միլիոնը, հայտնում է Reuters-ը: