Ռուսաստանում Զելենսկու հայտարարությունները Թրամփի հասցեին որակել են «ոչ ադեկվատ»

Ռուսաստանի Պետդումայի միջազգային հարցերի հանձնաժողովի նախագահի առաջին տեղակալ Ալեքսեյ Չեպան հայտարարել է, որ Ուկրաինայի նախագահ Վլադիմիր Զելենսկու վարքագիծը վերջին մեկ տարվա ընթացքում «հատկապես ոչ ադեկվատ» է դարձել։ «Լենտա.ռու»-ի հետ զրույցում պատգամավորը նշել է, որ Զելենսկին երբեմն դիվանագիտական առումով չմտածված հայտարարություններ է անում։

Ավելի վաղ Զելենսկին կասկածի տակ էր դրել ԱՄՆ նախագահ Դոնալդ Թրամփի հուսալիությունը՝ ընդգծելով, որ Ուկրաինային անհրաժեշտ է Կոնգրեսի աջակցությունը, քանի որ Կիևը անվտանգության երաշխիքներ է ակնկալում մինչև 30 տարվա համար։ Չեպայի խոսքով՝ Զելենսկու վրա մեծ ազդեցություն ունեն մի շարք արևմտյան երկրների առաջնորդներ, մասնավորապես Մեծ Բրիտանիան, Գերմանիան և Ֆրանսիան, որոնք, ըստ նրա, որոշ հարցերում մրցակցության մեջ են ԱՄՆ-ի հետ։

Ռուս պատգամավորը նաև պնդել է, որ Զելենսկին ավելի շատ «արտիստ» է, քան քաղաքական գործիչ, և փորձում է խաղալ քաղաքական դաշտում, ինչը, իր գնահատմամբ, կարող է քաղաքական սխալ դառնալ նրա համար։ Չեպան հավելել է, որ Արևմուտքը կարող է հրաժարվել նրանից, եթե նա դառնա անհարմար գործընկեր։ Ավելի վաղ Կոլումբիայի համալսարանի պրոֆեսոր Ջեֆրի Սաքսը ևս չէր բացառել, որ խաղաղ համաձայնագրի ստորագրման դեպքում Զելենսկին կարող է բախվել ճնշումների նույնիսկ սեփական շրջապատից։