Բրիտանական թագավորական ընտանիքի սկանդալները՝ տասնամյակների ընթացքում. Al Jazerra

Մեծ Բրիտանիայի թագավորական ընտանիքը տասնամյակներ շարունակ հայտնվել է սկանդալների կիզակետում՝ սկսած անձնական հարաբերություններից մինչև քրեական մեղադրանքներ։ Վերջին աղմկահարույց դեպքը վերաբերում է նախկին արքայազն Էնդրյու Մաունթբաթեն-Վինձորին, որը ձերբակալվել էր Ջեֆրի Էփսթեյնի գործի շրջանակում պաշտոնեական չարաշահման կասկածանքով և մի քանի ժամ անց ազատ արձակվել։ Նա դարձել է վերջին ավելի քան 350 տարվա ընթացքում առաջին բրիտանացի արքայական անձը, ով հայտնվել է ոստիկանության կալանքի տակ։

Թագավորական ընտանիքի հեղինակությունը լրջորեն տուժել էր դեռևս 1990-ականներին։ 1992 թվականը Եղիսաբեթ Երկրորդ թագուհին անվանել էր «annus horribilis»՝ «սարսափելի տարի», երբ նրա երեք զավակների ամուսնությունները քայքայվեցին, իսկ մամուլում տարածվեցին արքայադուստր Դիանայի և արքայազն Չարլզի անձնական զրույցների ձայնագրությունները՝ հայտնի «Squidgygate» և «Camillagate» սկանդալներով։ 1995-ին Դիանայի աղմկահարույց հարցազրույցը BBC-ին բացահայտեց թագավորական կյանքի ներսի լարվածությունը, իսկ 1997-ին նրա ողբերգական մահը Փարիզում զանգվածային վշտի ալիք բարձրացրեց և քննադատության արժանացրեց պալատի արձագանքը։

Հետագա տարիներին սկանդալները շարունակվեցին՝ արքայադուստր Աննայի քրեական տուգանքից մինչև արքայազն Հարիի նացիստական համազգեստով լուսանկարները և «Megxit»-ը, երբ Հարին և Մեգան Մարքլը հրաժարվեցին ավագ թագավորական պարտականություններից։ 2023-ին Հարիի «Spare» հուշագրությունը նոր լարվածություն առաջացրեց ընտանիքի ներսում՝ բացահայտելով անձնական կոնֆլիկտներ և ծառայության տարիների մանրամասներ։ Այս իրադարձությունները ցույց են տալիս, որ բրիտանական միապետությունը, չնայած դարավոր ավանդույթներին, շարունակում է բախվել հանրային վստահության և հեղինակության մարտահրավերների։