ՌԴ նավատորմի ռազմանավը մասնակցել է «Milan 2026» միջազգային ռազմածովային զորավարժություններին

Ռուսաստանի Խաղաղօվկիանոսյան նավատորմի «Մարշալ Շապոշնիկով» ռազմանավը Բենգալյան ծոցում մասնակցել է «Milan 2026» միջազգային ռազմածովային զորավարժություններին՝ անցկացնելով կրակային վարժանքներ, հաղորդում է TASS-ը։

Ռազմանավը այլ երկրների նավերի հետ իրականացրել է համատեղ պաշտպանական գործողություններ։ Անձնակազմը կիրառել է 100 մմ A-190 և 30 մմ AK-630 հրանոթներ։ Որպես պայմանական հակառակորդ օգտագործվել է քարշարկվող թիրախ, իսկ օդային հարձակումը մոդելավորվել է ավիացիայի միջոցով։ Զորավարժությունների ընթացքում մշակվել են նաև հակասուզանավային գործողություններ, ականապատ տարածքների հաղթահարում և պայմանական ծովային ականների ոչնչացում։

ՌԴ ռազմածովային ուժերի գլխավոր հրամանատար, ծովակալ Ալեքսանդր Մոիսեևը նշել է, որ զորավարժությունները անցկացվում են համագործակցության և անվտանգության ապահովման նպատակով՝ տարածաշրջանում կայունության ամրապնդման շրջանակում։

Ռազմանավը կառուցվել է 1985 թվականին, 2016-ին արդիականացվել է և զինվել «Կալիբր-ՆԿ» ու «Ուրան» հրթիռային համակարգերով, իսկ 2021-ին վերադարձել է ծառայության։