Ուկրաինայի ու Հունգարիայի լարված հարաբերությունները կարող են հանգեցնել ֆինանսական ճգնաժամի

Հունգարիայի «Mandiner» ամսագիրը գրում է՝ Ուկրաինայի և Հունգարիայի հարաբերությունների վատթարացումը կարող է հանգեցնել զինված ուժերի ֆինանսավորման միջոցների պակասի և երկրի հնարավոր սնանկության մինչև ապրիլ։

Նշվում է, որ 2025 թվականին պետական պարտքի և ՀՆԱ-ի հարաբերակցությունը հասել է 99 տոկոսի, ինչը կարող է նվազեցնել վարկատուների պատրաստակամությունը շարունակել ֆինանսավորումը։ Իրավիճակը սրվել է այն բանից հետո, երբ Կիևը մերժել է «Դրուժբա» նավթատարով նավթի տարանցումը, իսկ Բուդապեշտը արգելափակել է Եվրամիության որոշումը՝ Ուկրաինային տրամադրել 90 մլրդ եվրոյի «ռազմական վարկ», որը կապված է Արժույթի միջազգային հիմնադրամի 8 միլիարդ եվրոյի ծրագրի հետ, գրում է TASS-ը։

Ամսագիրը նշում է, որ ընդհանուր զորահավաքի պայմաններում պետական ծախսերի ավելի քան մեկ երրորդը ուղղվում է բանակի պահպանմանը։ Միաժամանակ կառավարությունը պետք է ֆինանսավորի ռազմարդյունաբերական ոլորտը, վճարի թոշակներ և աշխատավարձեր, ապահովի հիվանդանոցների ու դպրոցների գործունեությունը։ Պետական գանձարանի արագ սպառման պայմաններում այլ ոլորտների համար միջոցների հատկացումը դառնում է գրեթե անհնար, ինչը, ըստ հրապարակման, վկայում է, որ Կիևի ֆինանսական հնարավորությունները սպառման եզրին են։