Ի՞նչ նպատակով են թշնամուն հանձնած քարտեզներից հետո, հիմա էլ նկարահանվում և հրապարակվում դիրքերը (տեսանյութ)

Ի՞նչ նպատակով և ու՞մ համար են թշնամուն հանձնած քարտեզներից հետո հիմա էլ նկարահանվում և հրապարակվում դիրքերը Տարիներ շարունակ զինված ուժերում մի շարք անձանց և ՀԿ-ների մուտքը բանակ, սահմանային դիրքեր, հրաձգարաններ և զորամասեր, արգելված է եղել, դրանց համար հատուկ գրություն պիտի լիներ: Փոխարենն այսօր ամեն ինչ բաց է փաշինյանական թիմի արտոնյալների համար։

Ինֆորմացիոն հոսքերի կառավարումն ու նկարահանումներն անգամ, լրագրողներիս համար նախկինում համակարգվում էր խստագույն ռեժիմով, կար կարգ ու կանոն ու դրան խստորեն հետևող հրամանատար, վարչական աշխատող, ու դա հիմնովին պատճառաբանված էր: Բայց 2018-ից հետո, այդ խստությունը այլևս չի գործում, դեռ մի բան էլ առաջարկվում է բեմադրել զինվորի ծնողի աչքին հաճելի տեսարաններ ու խուսափել նկարահանել բանակի իրականությունը: կինոռեժիսոր «Դիրքերում» հաղորդաշարի հեղինակ և վարող Արշակ Զաքարյանը բազմաթիվ այսպիսի դրվագներ է հիշում:

Չմոռանանք, նախկինում ընդունված արգելքների մեջ նաև մի այսպիսի կանոն կար. Պատերազմի օրերին առաջնագիծ գնացողին, հարազատն իրավունք չուներ անգամ 1 հատ լուսանկարել: Չէին վստահում, համարում էին, որ ռազմի դաշտ գնացողին չպիտի թշնամին դեմքով ճանաչի: Բայց դա լուսանկար էր, որը ռազմաճակատ մեկնող որոշ տղաներից հնարավոր է մնար որպես վերջին հուշը։ Բայց արի ու տես, որ 44-օրյայի օրերին ակտիվ ռեժիմով էր գործում Նիկոլ Փաշինյանի կինը՝ իր կազմավորած «Էռատո» ջոկատով, մի ամբողջ ֆոտոշարք էր հրապարակում դիրքից, որտեղ երևում էր և՛ հրաձգարանի ողջ սարք ու կարգը, և՛ տեղակայման վայրը, բայց սա կարելի էր տիկնոջը, որովհետև նա Փաշինյանի կինն էր։ 44-օրյա պատերազմի ողջ ընթացքում, արտոնյալներն անարգել տեսանյութեր, լուսանկարներ և լայվեր էին տարածում զորամասերից, սուրճ խմելու տեսարաններ, բունկերից խիստ կենցաղային նկարներ՝ իբր թիկունքում լարված սպասող մայրերին ուժ տալու համար:

Որոշ բլոգերներ և զինվորական համազգեստով անձինք անմիջապես կռվի դաշտից, քաղաքական հայտարարություններ էին անում ու սպառնալիքներ հնչեցնում ընդդիմախոսների հասցեին՝ Փաշինյանի իշխանությունը չճոճելու համար: Եվ սրանք նոյեմբերի 9-ի կապիտուլյացիան ստորագրելուց հետո ընդհանուր առմամբ հողատվությունը արդարացնողներն էին, որոնց հատուկ նկարահանել էին՝ քաղաքական դրդապատճառով՝ զենքը ձեռքներին և այդ տեսնյութը Հանրապետության հրապարակի էկրանից ցուցադրելով ՝ սպառնում ու ահաբեկում էին այլախոհներին։ Եվ այսօր՝ մոդեռն մտածող , լայվեր սիրող իշխանությունը բաց խաղաքարտերով մեզ ու թշնամուն է հրամցնում ամենաարգելվածը, ամենաթաքցնելիքն ու բանակի ներքին ինֆորմացիան: Այժմ էլ տեղի է ունենում հաջորդ աբսուրդային գործողությունը. Պաշտպանության նախարար Սուրեն Պապիկյանը, փետրվարի 10-ին և 11-ին, իր սոցցանցից թշնամուն է տրամադրում Զինված ուժերի պաշտպանական կառույցների մասին ինֆորմացիա:

Ավելի քան 20 տարի, ուժային կառույցներում օպերատոր աշխատած փորձագետը վստահ է․ նախարարի հրապարակած կադրերը խոսուն փաստեր են, որ մեր անվտանգային կետերը հակառակորդի համար հեշտ թիրախ են դարձնում։ Պաշտպանության նախարար Սուրեն Պապիկյանն իր այս տեսանյութով փորձել է իբր հաշվետվողականություն ցույց տալ, մինչդեռ ՊՆ ռեսուրսներով անթույլատրելի հոլովակ է նկարել իր ՔՊ-ական թիմին օգնելու համար: Ըստ ռեժիսոր Արշակ Զաքարյանի, այդպիսի լավ ամրակայված բետոնե դիրքեր, կային նաև նախկինում, սակայն դրանց մասին չէր խոսվում, չէին նկարահանվում ու գովազդվում այն էլ քաղաքական ակցիաների վերածելով։ Նման բանն անթույլատրելի էր, այնինչ այսօր հենց ՊՆ-ն է խախտումներ անում՝ ստորադասելով անվտանգույթյան նորմերը, հանուն իշխող կլանի Փի-Առ-ի։

Նկատենք, որ սա թշնամուն գաղտնիք պարունակող տեղեկատվություն տրամադրելու վերաբերյալ, արդեն տասներորդ դրվագն է: Արցախի վերջին պատերազմի կապիտուլյացիայից և հսկայական տարածքներ առանց 1 կրակոցի Ադրբեջանին հանձնելուց հետո, որպես «հումանիտար քայլ» հակառակորդին գաղտնի հանձնվեցին, հետո ազդարարվեց Ակնայի և այլ տեղամասերի ականապատված դաշտերի քարտեզների մասին, փոխարենը չստանալով ոչ մի գերի, կամ թեկուզ պատասխան «հումանիտար ժեստ»։