ՍՎՕ-ի տարեդարձին Կրեմլը խոսում է Արևմուտքի հետ դիմակայության մասին, Կիևն ու ԵՄ-ն՝ նոր ծրագրերի

Հատուկ ռազմական գործողության չորրորդ տարեդարձի առիթով Ռուսաստանի նախագահի մամուլի քարտուղար Դմիտրի Պեսկովը հայտարարել է, որ ՍՎՕ-ն վերածվել է Ռուսաստանի և Արևմուտքի միջև լայնածավալ դիմակայության։ Նրա խոսքով՝ գործողության նպատակները դեռ ամբողջությամբ չեն իրագործվել, ինչի պատճառով այն շարունակվում է, սակայն Մոսկվան շարունակում է պատրաստակամ մնալ հակամարտությունը քաղաքական-դիվանագիտական ճանապարհով կարգավորելու հարցում։ Պեսկովը նշել է, որ այժմ գործընթացի ելքը մեծապես կախված է ուկրաինական կողմի քայլերից։

Իր հերթին Ուկրաինայի նախագահ Վլադիմիր Զելենսկին հայտարարել է, որ Կիևը մտադիր է ավելացնել անօդաչու սարքերի արտադրությունն ու հարվածների ինտենսիվությունը։ Նրա խոսքով՝ երկիրը մեկ տարվա ընթացքում արտադրում է ավելի քան երեք միլիոն FPV-դրոն, սակայն դա դեռ բավարար չէ։ Ուկրաինայի պաշտպանության նախարար Միխայիլ Ֆեդորովը ներկայացրել է երեք առաջնահերթություն՝ պաշտպանել օդային տարածքը, կասեցնել ռուսական զորքերի առաջխաղացումը և սահմանափակել Մոսկվայի նավթային եկամուտները։

Տարեդարձի օրը հայտարարությամբ հանդես է եկել նաև Եվրամիությունը՝ վերահաստատելով Ուկրաինային անդամակցության ճանապարհին աջակցելու պատրաստակամությունը։ ԵՄ ղեկավարների համատեղ հայտարարության մեջ ընդգծվել է, որ «ապահով և բարեկեցիկ Ուկրաինայի ապագան Եվրամիությունում է», և որ երկիրը զգալի առաջընթաց է գրանցել անհրաժեշտ բարեփոխումների իրականացման ուղղությամբ՝ անգամ զինված հակամարտության պայմաններում։