Արևմտյան լրատվամիջոցը պնդում է․ Ռուսաստանը ստեղծել է «միջմայրցամաքային» կործանիչ-ռմբակոծիչ

Արևմտյան Military Watch Magazine-ը գրում է, որ ռուսական Սու-34 կործանիչ-ռմբակոծիչը ներկայումս համարվում է աշխարհում ամենահեռահար տակտիկական մարտական ինքնաթիռը։ Հրապարակման համաձայն՝ իր թռիչքային շառավղով այն մոտենում է ռազմավարական ռմբակոծիչներին, ինչը թույլ է տալիս այն պայմանականորեն բնութագրել որպես «միջմայրցամաքային» դասի մարտական օդանավ։

Պարբերականը նշում է, որ Սու-34-ը ստեղծվել է խորհրդային Սու-27 կործանիչի հիման վրա, սակայն ունի զգալիորեն մեծացված ներքին վառելիքի պաշարներ։ Առանց լրացուցիչ բաքերի այն կարող է թռչել մոտ 4800–5000 կմ, իսկ երեք արտաքին վառելիքային բաքի դեպքում՝ մինչև 8000 կմ։ Սակայն ռազմական բեռնվածությամբ և ակտիվ մանևրումների պայմաններում միջմայրցամաքային հեռահարությունը հնարավոր չէ ապահովել առանց օդում վերալիցքավորման։

Հոդվածում նշվում է, որ ինքնաթիռի հնարավորությունները կարող են էապես աճել՝ նոր սերնդի АЛ-51Ф շարժիչի կիրառմամբ, որը մշակվել է Սու-57ի համար և ապահովում է ավելի բարձր վառելիքային արդյունավետություն։ Մի շարք փորձագետներ Սու-34-ը բնութագրում են որպես Ռուսաստանի ամենակարևոր մարտական ինքնաթիռներից մեկը՝ ընդգծելով դրա բազմաֆունկցիոնալությունն ու տարբեր պայմաններում գործողության կարողությունը։