Քիմ Քարդաշյանի մոլի երկրպագու Ջորդան Պարկը հայտնաբերվել է մահացած

Ամերիկացի հեռուստաաստղ Քիմ Քարդաշյանի մոլի երկրպագու, բրիտանացի Ջորդան Պարկը, որը հայտնի էր որպես «շուրթերի արքա», հայտնաբերվել է առանց կենսական նշանների Լոնդոնի հյուրանոցներից մեկում։ Այս մասին հայտնում է ITVը։

34-ամյա տղամարդուն գտել են հյուրանոցի համարում՝ անկողնում։ Սենյակում հայտնաբերվել են նաև մի քանի փաթեթ դեղամիջոցներ։ Իրավապահների տվյալներով՝ դեպքից կարճ ժամանակ առաջ նա ենթարկվել էր հերթական պլաստիկ վիրահատությանը։ Մամուլի տեղեկություններով՝ խոսքը կարող է վերաբերել հետույքի բրազիլական լիպոֆիլինգին (BBL)։ Դեպքի առթիվ ձերբակալվել են 43-ամյա տղամարդ և 52-ամյա կին, որոնք հետագայում ազատ են արձակվել գրավի դիմաց։

Պարկը հայտնի էր պլաստիկ վիրահատությունների հանդեպ իր մոլուցքով և, ըստ հրապարակումների, տարիների ընթացքում ծախսել էր ավելի քան 130 հազար ֆունտ ստեռլինգ արտաքին փոփոխությունների վրա։ Նա նաև զբաղվում էր կոսմետոլոգիական ծառայություններով և նախկինում հայտնվել էր իրավապահների ուշադրության կենտրոնում՝ անօրինական ներարկումներ վաճառելու մեղադրանքով։ Քննությունը շարունակվում է։