Anadolu. ԱՄՆ-ը հունվարի սկզբից ի վեր Մերձավոր Արևելք է տեղակայել ավելի քան 300 ինքնաթիռ

Տարվա սկզբից ի վեր Միացյալ Նահանգները ավելի քան 300 ռազմական ինքնաթիռ է տեղակայել ԱՄՆ Կենտրոնական հրամանատարության (CENTCOM) պատասխանատվության գոտում՝ Իրանի շուրջ իրավիճակի հնարավոր սրման ֆոնին, հաղորդում է «Անադոլու» լրատվական գործակալությունը՝ հղում անելով հետախուզական տվյալներին։

Գործակալության տվյալներով՝ ավելի քան 300 ռազմական ինքնաթիռ տեղակայված է Քաթարի «Ալ Ուդեյդ» ավիաբազայում, Հորդանանի «Մուվաֆաք Սալթի» ավիաբազայում և Սաուդյան Արաբիայի «Փրինս Սուլթան» ավիաբազայում, ինչպես նաև տարածաշրջան ժամանած ԱՄՆ ռազմածովային ուժերի «USS Abraham Lincoln» և «USS Gerald R. Ford» ավիակիրների վրա։

Տարածաշրջանում ԱՄՆ ռազմաօդային ուժերի մեծ մասը բաղկացած է 84 F-18 կործանիչներից և 48 F-16 կործանիչներից։ Գործակալությունը նշում է, որ Մերձավոր Արևելքում այս քանակությամբ տեխնիկան կենտրոնացնելու համար ԱՄՆ զինված ուժերը հունվարից ի վեր իրականացրել են մոտ 270 լոգիստիկ թռիչք։