Բելլա Հադիդը խոսել է Լայմի հիվանդության դեմ պայքարի և աշխատանքի դժվարությունների մասին

Ամերիկացի սուպերմոդել Բելլա Հադիդը իտալական Vogue Italia-ին տված հարցազրույցում խոսել է Լայմի հիվանդության դեմ երկարատև պայքարի ընթացքում աշխատանքի հետ կապված բարդությունների մասին։ 29-ամյա մոդելը խոստովանել է, որ տարիներ շարունակ չէր կարողանում հրաժարվել համագործակցության առաջարկներից և իրեն զգում էր «փոխարինելի»։

Նրա խոսքով՝ նախկին աշխատանքային ռեժիմը կենսունակ չէր, քանի որ նույնիսկ համավարակի շրջանում շարունակել է աշխատել՝ անտեսելով առողջական խնդիրները։ Սակայն այժմ նա սկսել է առաջնահերթություն տալ առողջությանը, ավելի շատ ժամանակ անցկացնել ֆերմայում և ընտրել միայն այն նախագծերը, որոնք իրեն իսկապես հաճույք են պատճառում։ «Երկար ժամանակ մտածում էի, որ իրավունք չունեմ մերժելու աշխատանքը։ Այժմ կարող եմ ասել՝ ոչ», նշել է նա՝ ընդգծելով, որ բուժման նպատակով մեկ տարի դադար է վերցրել։

Հադիդը հիվանդանոց էր տեղափոխվել 2025 թվականի սեպտեմբերի 18-ին՝ Լայմի հիվանդության սրացման պատճառով, որը նրա մոտ ախտորոշվել էր դեռ 2012-ին։ Ավելի ուշ նրա մայրը՝ հեռուստաաստղ Յոլանդա Հադիդը, հրապարակել էր դստեր լուսանկարը հիվանդասենյակից, ինչից հետո որոշ օգտատերեր կասկածի տակ էին դրել ախտորոշումը՝ ուշադրություն դարձնելով լուսանկարում երևացող բժշկական սարքավորումներին։