ԻՊ-ի հարձակման հետևանքով սիրիական բանակի զինվորներ են զոհվել ու վիրավորվել

«Իսլամական պետությունը» (ԻՊ) ստանձնել է Սիրիայի հյուսիսում գտնվող Ռակկայի նահանգում տեղի ունեցած հարձակման պատասխանատվությունը, որի հետևանքով զոհվել է 4, վիրավորվել՝ սիրիական բանակի 3 զինվոր, հաղորդում է Syria TV-ն։

Խմբավորման «Ամակ» լրատվական գործակալությունը հաղորդել է, որ ԻՊ-ի զինյալները փետրվարի 24-ին հարձակում են գործել Ռակկա քաղաքի մոտակայքում գտնվող Սիրիայի ներքին անվտանգության ուժերի դիրքի վրա։ Գործակալության փոխանցմամբ՝ ԻՊ-ի զինյալները մոտեցել են սիրիական բանակի դիրքին և մոտ հեռավորությունից կրակ են բացել դիրքի ուղղությամբ, որի հետևանքով զոհեր ու վիրավորներ են արձանագրվել։

Սիրիայի ներքին գործերի նախարարությունը ևս հայտնել է հարձակման և զոհերի ու վիրավորների մասին՝ նշելով, որ անվտանգության ուժերը կարողացել են չեզոքացնել հարձակվող խմբի անդամներից մեկին, մինչդեռ մնացած անդամներին հետապնդելու գործողությունները շարունակվում են։