Apple-ը կրկին տուգանվել է Բրազիլիայում՝ iPhone-ները լիցքավորիչի բացակայությամբ վաճառելու համար

Ամերիկյան տեխնոլոգիական հսկա Apple-ը կրկին տուգանվել է Բրազիլիայում՝ iPhone սմարթֆոնները առանց լիցքավորիչի վաճառելու պատճառով։ 9to5Mac մասնագիտացված պարբերականի փոխանցմամբ՝ Ալագոաս նահանգի սպառողների իրավունքների պաշտպանության մարմինը ընկերությանը պարտավորեցրել է վճարել 101 627 ռեալ տուգանք՝ մոտ 1,5 միլիոն ռուսական ռուբլու համարժեք։ Կարգավորիչը հայտարարել է, որ ընկերությունը վաճառել է սարքեր առանց «արտադրանքի կանոնավոր օգտագործման համար անհրաժեշտ բաղադրիչի»։

Procon-AL սպառողների պաշտպանության կազմակերպությունը նշել է, որ լիցքավորիչի առանձին գնման պարտադրումը սպառողի վրա դնում է լրացուցիչ բեռ և հակասում է թափանցիկության ու բարեխղճության սկզբունքներին։ Ըստ կարգավորիչի՝ նման քաղաքականությունը խախտում է սպառողների իրավունքները, քանի որ սարքը լիարժեք օգտագործելու համար անհրաժեշտ պարագան չի ներառվում հիմնական փաթեթում։

Apple-ը 2020 թվականից դադարեցրել է iPhone-ները լիցքավորիչով համալրելը՝ հիմնավորելով քայլը շրջակա միջավայրի պահպանության նկատառումներով։ 2022 թվականին Բրազիլիայի արդարադատության նախարարությունն անգամ ժամանակավորապես կասեցրել էր ընկերության սմարթֆոնների վաճառքը նույն պատճառաբանությամբ։ Հետագայում նման քաղաքականություն որդեգրեցին նաև Samsung-ը և մի շարք այլ արտադրողներ։ Միևնույն ժամանակ, Omdia-ի վերջին տվյալներով՝ 2025 թվականին Եվրոպայում ամենավաճառվող սմարթֆոնը դարձել է Samsung Galaxy A56 5G-ը, որին հաջորդում են iPhone 16-ը և Samsung Galaxy A16-ը։