Զելենսկին մանրամասներ է հայտնել ԱՄՆ նախագահի հետ ունեցած հեռախոսազրույցից

Ուկրաինայի նախագահ Վոլոդիմիր Զելենսկին հայտարարել է, որ ԱՄՆ նախագահ Դոնալդ Թրամփի հետ հեռախոսազրույցում պայմանավորվել են մարտին անցկացնել եռակողմ բանակցությունների հերթական փուլը՝ Ուկրաինայի, ԱՄՆ-ի և Ռուսաստանի մասնակցությամբ, որը կարող է ճանապարհ հարթել երկրների ղեկավարների հանդիպման համար։

Զելենսկին նշել է, որ Վաշինգտոնը շահագրգռված է հնարավորինս արագ ավարտել պատերազմը, սակայն կողմերի միջև տարաձայնությունները շարունակում են մնալ՝ հատկապես տարածքային հարցում։ Նա ընդգծել է, որ խնդիրը այժմ ավելի շատ քաղաքական կամքի մեջ է, քան ռազմական դաշտում։

Նախատեսվում է նաև Ուկրաինա-ԱՄՆ երկկողմ հանդիպում, որտեղ կքննարկվեն հետպատերազմյան վերականգնման ծրագրերը, ռազմագերիների փոխանակման հարցերը և տնտեսական համագործակցությունը։ Ուկրաինան հույս ունի առաջիկա տասնամյակում ներգրավել շուրջ 800 միլիարդ դոլար վերականգնման համար, մինչդեռ Համաշխարհային բանկի վերջին գնահատմամբ վերակառուցման ծախսերը կարող են հասնել 588 միլիարդ դոլարի։ Այս մասին հաղորդում է Reuters-ը։