Politico. ԱՄՆ-ը չի բացառել Իրանի գերագույն առաջնորդին հարված հասցնելը

ԱՄՆ իշխանությունները քննարկում են Իրանի գերագույն առաջնորդ այաթոլլահ Ալի Խամենեիի սպանության հարցը՝ երկիրը «գլխատելու» նպատակով, հաղորդում է Politico-ն՝ հղում անելով աղբյուրներին։

ԱՄՆ նախագահ Դոնալդ Թրամփի խորհրդականները վստահ են, որ Միացյալ Նահանգները «կռմբակոծի» Իրանը։ Մեկ այլ աղբյուրի համաձայն՝ ԱՄՆ-ը նույնպես քննարկում է Թեհրանի միջուկային օբյեկտներին հարվածներ հասցնելու հնարավորությունը։

Ըստ թերթի՝ Վաշինգտոնի վարչակազմին մոտ կանգնած անձինք կարծում են, որ Միացյալ Նահանգների համար ավելի ձեռնտու կլինի, եթե Իսրայելը առաջին հարվածը հասցնի Իրանին։ Նրանք կարծում են, որ Իսրայելի հնարավոր հարձակումը կհանգեցնի այնպիսի պատասխանի, որը Վաշինգտոնին կտա պատրվակ հակամարտության մեջ մտնելու համար։

«Վարչակազմի ներսում և շրջակայքում կա տեսակետ, որ քաղաքականապես ձեռնտու կլինի, եթե Իսրայելը առաջին հարվածը հասցնի, որին իրանցիները կպատասխանեն նույն կերպ և մեզ ավելի շատ խթան կտան գործելու», - թերթին ասել է աղբյուրներից մեկը։

Պաշտոնյաները կարծում են, որ ամերիկացի ընտրողները շատ ավելի կողմ կլինեն Իրանում ռազմական գործողություններին, եթե այն ուժ կիրառի ԱՄՆ դաշնակցի դեմ։ Այնուամենայնիվ, հրատարակության աղբյուրները համաձայն են, որ ԱՄՆ-Իսրայելի համատեղ հարվածը մնում է ամենահավանական սցենարը։ Վաշինգտոնում Իսրայելի դեսպանատունը հրաժարվել է մեկնաբանել հրատարակության հաղորդագրությունը։