Արաղչի. Իրանը պատրաստ է և՛ խաղաղ, և՛ ռազմական սցենարների

Իրանը լիովին պատրաստ է և՛ խաղաղ, և՛ ռազմական սցենարի, բայց նրա նպատակը հակամարտությունը կանխելն է։ Այս մասին հայտարարել է Իրանի արտաքին գործերի նախարար Աբբաս Արաղչին՝ Ժնևում ԱՄՆ-ի հետ բանակցություններից առաջ։

«Մենք լիովին պատրաստ ենք երկու տարբերակներին՝ պատերազմի, Աստված մի արասցե, և խաղաղության», - ասել է նա հնդկական India Today հեռուստաալիքին տված հարցազրույցում։ Իրանի նախարարը նշել է, որ «երկրի զինված ուժերը պատրաստ են կատարել իրենց առջև դրված խնդիրները, և Իրանը ի վիճակի է արդյունավետորեն պաշտպանվել»։

Նա հավելել է, որ Իրանը «շատ դասեր է քաղել վերջին պատերազմից և, հետևաբար, ավելի լավ է պատրաստված»։ «Եվ սա, ի դեպ, նշանակում է, որ նպատակը պատերազմը կանխելն է։ Երբ դու պատրաստ ես պատերազմի, կարող ես կանխել այն», - ասել է նա։

Արաղչին ընդգծել է, որ «Իրանի խաղաղ միջուկային ծրագրի համար ռազմական լուծում չկա»։