Ավստրալիան և Նոր Զելանդիան պատրաստ են աջակցել արքայազն Էնդրյուի հեռացմանը գահաժառանգության շարքից

Ավստրալիայի և Նոր Զելանդիայի կառավարությունների ղեկավարները հայտարարել են, որ պատրաստ են աջակցել Էնդրյու Մաունթբեթթեն-Վինձորի՝ Մեծ Բրիտանիայի գահի ժառանգության շարքից հեռացման գործընթացին։ Այս մասին հայտնում է Daily Mail-ը։ Նշվում է, որ նման որոշման համար անհրաժեշտ կլինի ինչպես բրիտանական խորհրդարանի համաձայնությունը, այնպես էլ Համագործակցության այն 14 երկրների աջակցությունը, որտեղ թագավոր Չարլզ III-ը համարվում է պետության ղեկավար։

Ավստրալիայի վարչապետ Էնթոնի Ալբանիզեն նամակ է հղել Մեծ Բրիտանիայի վարչապետ Քիր Սթարմերին՝ հայտնելով, որ իր երկիրը պատրաստ է թույլ տալ նախկին արքայազնի զրկումը գահի իրավահաջորդության իրավունքից։ «Ես համաձայն եմ Նրա Մեծության հետ, որ օրենքը պետք է ընթանա իր ճանապարհով», — նշել է Ալբանիզեն։ Նոր Զելանդիայի վարչապետ Քրիստոֆեր Լաքսոնի ներկայացուցիչը ևս հաստատել է, որ Վելինգթոնը կաջակցի նման որոշմանը։

Էնդրյուն ներկայումս զբաղեցնում է բրիտանական գահի ժառանգության ութերորդ տեղը։ Վերջին տարիներին նա բախվել է անչափահասների նկատմամբ սեռական բռնության մեղադրանքների։ 2025 թվականի հոկտեմբերին նա զրկվել էր արքայական տիտղոսներից, իսկ փետրվարի 19-ին հայտնի դարձավ նրա ձերբակալության մասին։