Meizu-ն կարող է դադարեցնել սմարթֆոնների արտադրությունը

Չինական Meizu ընկերությունը կարող է փակել սմարթֆոնների արտադրությամբ զբաղվող իր բաժինը։ Այս մասին հայտնում է Interface News-ը՝ վկայակոչելով մի քանի աղբյուրների։ Ըստ հրապարակման՝ ընկերությունը փաստացի կդադարեցնի գործունեությունը այդ ուղղությամբ, իսկ ստորաբաժանման փակումը նախատեսվում է մարտին։ Նշվում է, որ Meizu-ն ֆինանսական դժվարությունների առաջ է կանգնած՝ ունենալով պարտքեր գործընկերների և աշխատակիցների նկատմամբ։

Միևնույն ժամանակ տեղեկացվում է, որ Meizu Auto ստորաբաժանումը, որը ներգրավված է ավտոմոբիլային նախագծերում, կշարունակի գործել անկախ ձևաչափով։ Meizu ապրանքանիշը կմնա դրա սեփականատեր Geely ընկերության վերահսկողության տակ։

Հրապարակման հեղինակները հիշեցնում են, որ դեռ հունվարին Meizu-ի ներկայացուցիչները ակնարկել էին բարդ իրավիճակի մասին։ Ընկերության մարքեթինգի տնօրեն Վան Չժիցյանը հայտարարել էր, որ օպերատիվ հիշողության թանկացումը ազդել է պլանների վրա, ինչի հետևանքով չեղարկվել է Meizu 22 Air մոդելի թողարկումը։ Ավելի վաղ, 2022 թվականի հուլիսին, Geely-ի դուստր ընկերություններից մեկը ձեռք էր բերել Meizu-ն՝ հայտարարելով, որ նպատակ ունի երեք տարվա ընթացքում վերադարձնել բրենդը միջին և բարձր դասի սմարթֆոնների շուկայի առաջատար հնգյակ։