Հունգարիան արգելափակում է ՌԴ-ի դեմ պատժամիջոցները՝ պահանջելով 16 միլիարդ եվրոյի պաշտպանական վարկ

Հունգարիան կարող է շարունակել արգելափակել Ռուսաստանի դեմ ԵՄ-ի 20-րդ պատժամիջոցների փաթեթը, քանի դեռ Բրյուսելը չի հաստատել Բուդապեշտի՝ 16 միլիարդ եվրոյի պաշտպանական վարկի հայտը ԵՄ SAFE ռազմականացման ծրագրի շրջանակում, գրում է Politico Europe-ը՝ հղում անելով իր աղբյուրներին։

Ավելի վաղ Հունգարիան արգելափակել էր ինչպես նոր պատժամիջոցների փաթեթի ընդունումը, այնպես էլ Ուկրաինայի համար նախատեսված 90 միլիարդ եվրոյի եվրոպական ռազմական վարկը՝ պատճառաբանելով, որ Կիևը դադարեցրել է ռուսական նավթի մատակարարումը «Դրուժբա» նավթատարով։ Դիվանագիտական աղբյուրների համաձայն՝ Բուդապեշտը պատրաստվում է պահպանել իր արգելափակումը, մինչև հաստատվի վարկի հայտը, գրում է TASS-ը։

Եվրահանձնաժողովը հերքում է, թե քաղաքական պատճառներով է ձգձգում գործընթացը։ Այնուամենայնիվ, հունգարական տվյալներով՝ հունվարի 27-ից նավթ չի մատակարարվում «Դրուժբա»-ով դեպի MOL ընկերության վերամշակման գործարան։ Բուդապեշտը պնդում է, որ Կիևը կասեցրել է տարանցումը քաղաքական դրդապատճառներով, և ի պատասխան՝ դադարեցրել է Ուկրաինային դիզվառելիքի մատակարարումը՝ սպառնալով նաև դադարեցնել էլեկտրաէներգիայի արտահանումը։