Նովակ․ Ռուսաստանի նավթի պաշարները կարող են բավարարել մինչև 62 տարի

Ռուսաստանում նավթի պաշարները կարող են բավարարել մոտ 62 տարի, սակայն դա չի նշանակում, որ այդ ժամկետից հետո հումքը կսպառվի։ Այս մասին հայտարարել է Ռուսաստանի փոխվարչապետ Ալեքսանդր Նովակը՝ փոխանցում է ՏԱՍՍ-ը։

Նովակի ներկայացրած տվյալների համաձայն՝ ներկայումս Ռուսաստանի տնտեսական առումով շահավետ նավթային պաշարները կազմում են շուրջ 15 միլիարդ տոննա, ինչը կարող է բավարարել մոտ 32 տարի։ Միևնույն ժամանակ երկրաբանական արդյունահանելի պաշարները գնահատվում են մոտ 31 միլիարդ տոննա, որոնք տեսականորեն կարող են ապահովել 62 տարվա արտադրություն։

Փոխվարչապետը նշել է, որ երկրում շարունակվում են հետախուզական և հորատման աշխատանքները, ինչի շնորհիվ հաշվեկշռում մշտապես ավելացվում են նոր ծավալներ։ Նրա խոսքով՝ կառավարության հիմնական նպատակն է ապահովել առնվազն 30-50 տարվա կայուն պաշարային բալանս։ Ավելի վաղ էներգետիկայի նախարար Սերգեյ Ցիվիլևը հայտարարել էր, որ Ռուսաստանի ընդհանուր նավթային պաշարների միայն մոտ կեսն է տնտեսապես շահավետ արդյունահանման համար։