ՄԱԿ-ի տվյալներով՝ Պակիստան–Աֆղանստան բախումները կարող են ազդել Ռուսաստանի ներմուծումների վրա

Պակիստանի և Աֆղանստանի միջև զինված բախումների պատճառով Ռուսաստանը կարող է բախվել մի շարք ապրանքների մատակարարման խափանումների։ Այս մասին հայտնում է «ՌԻԱ Նովոստի»-ն՝ հղում անելով ՄԱԿ-ի Comtrade առևտրային հարթակի տվյալներին։

Ըստ հրապարակման՝ սահմանային լարվածությունը կարող է ազդել հատկապես Պակիստանից Ռուսաստան արտահանվող հագուստի, կաշվե արտադրանքի և կարտոֆիլի մատակարարումների վրա։ 2025 թվականի առաջին կիսամյակում Պակիստանը Ռուսաստան է արտահանել նշված ապրանքներ համապատասխանաբար 15,3 միլիոն, 12,2 միլիոն և 6 միլիոն դոլարի չափով։ Ընդհանուր առմամբ նույն ժամանակահատվածում արտահանումը կազմել է մոտ 45 միլիոն դոլար։

Հաղորդվում է, որ Աֆղանստանը ռազմական գործողություններ է սկսել Պակիստանի հետ սահմանին՝ ի պատասխան պակիստանյան ռազմաօդային ուժերի ավիահարվածների։ Փետրվարի 22-ի գիշերը Պակիստանի օդուժը հարվածներ է հասցրել Աֆղանստանի սահմանամերձ մի շարք նահանգների, ինչի հետևանքով, ըստ տեղական աղբյուրների, զոհվել են խաղաղ բնակիչներ։ Հետագա բախումները գրանցվել են մի քանի նահանգներում։