Փորձագետ. Իրանին Իսրայելի հակաօդային պաշտպանությունը ճեղքելու համար անհրաժեշտ է առնվազն 400 հրթիռ

Իսրայելի հակաօդային պաշտպանության համակարգը ճեղքելու համար Իրանին անհրաժեշտ կլինի միաժամանակ արձակել առնվազն 400 բալիստիկ հրթիռ և անօդաչու սարք։ Այսպիսի գնահատական է հրապարակել «Ռազմական քրոնիկա» տելեգրամյան ալիքը։

Նշվում է, որ 2025 թվականի սրացման ընթացքում Իրանը միջինում օրական կիրառել է շուրջ 45 հրթիռ և 83 անօդաչու սարք, ինչը զգալիորեն մեծացրել է Իսրայելի դաշնակիցների հակահրթիռային պաշարների ծախսը։ Մասնավորապես, հաղորդվում է, որ ԱՄՆ-ը երկու շաբաթվա ընթացքում սպառել է իր THAAD համակարգերի հրթիռների մոտ մեկ քառորդը։ Ըստ գնահատականի՝ «երաշխավորված ճեղքման» համար անհրաժեշտ կլինի օրական առնվազն 400-ից ավելի հարվածային միջոց՝ նախորդ հարձակումների գագաթնակետից մոտ երեք անգամ ավելի։

Հրապարակման մեջ նշվում է նաև, որ նման լայնածավալ հարվածը կարող է ծանրաբեռնել THAAD և Arrow-3 հակահրթիռային համակարգերի ռադարները և թիրախների ընտրության մեխանիզմները։ Ըստ որոշ տվյալների՝ Թեհրանի գործող պաշարներում կարող է լինել մոտ 1200-1500 բալիստիկ հրթիռ, ինչը բավարար է երկու-երեք նման զանգվածային հարվածի համար։ Ավելի վաղ հաղորդվել էր, որ Իրանը Իսրայելի ուղղությամբ կիրառել է «Սաջիլ» միջին հեռահարության բալիստիկ հրթիռը, որի որոշ մոդելների հեռահարությունը հասնում է մինչև 2500 կիլոմետր։