«Թեհրանը այլևս նույնը չի լինի». Իսրայելն ու ԱՄՆ-ը լայնածավալ հարվածներ են հասցրել Իրանի մայրաքաղաքին և միջուկային օբյեկտներին

Իսրայելը փետրվարի 28-ի առավոտյան կանխարգելիչ հարված է հասցրել Իրանին․ Թեհրանում արձանագրվել է առնվազն երեք հզոր պայթյուն։ Իսրայելի պաշտպանության նախարար Իսրայել Կացը հաստատում է հարձակման փաստը։ Հաղորդվում է, որ հարվածների թիրախում են եղել Իրանի նախագահի նստավայրը, Իսլամական հեղափոխության պահապանների կորպուսի հետախուզական շտաբը, մայրաքաղաքի օդանավակայանը, ինչպես նաև մի շարք ռազմավարական օբյեկտներ։ Տեղեկություններ են տարածվում նաև ԱՄՆ-ի ներգրավվածության մասին, ինչը հաստատում են իսրայելական կողմի ներկայացուցիչները։

Հարվածներից հետո Իրանն ու Իսրայելը փակել են իրենց օդային տարածքները։ Իսրայելում հայտարարվել է արտակարգ դրություն․ փակվել են դպրոցները, քաղաքացիներին հորդորել են մնալ ապաստարաններում։ Թեհրանի մի շարք շրջաններում անջատվել են բջջային կապի գծերը, սահմանափակվել է ինտերնետ հասանելիությունը։ Պայթյուններ են արձանագրվել նաև Իսֆահանում, որտեղ գտնվում է միջուկային կենտրոններից մեկը, ինչպես նաև Լորեստանում, Թավրիզում, Քոմում, Քերաջում և Քերմանշահում։ Իսրայելական աղբյուրները փոխանցում են, որ համատեղ հարվածները կարող են տևել առնվազն չորս օր և իրականացվել մի քանի փուլով։ Մի անանուն պաշտոնյա հայտարարում է, որ «Թեհրանը արդեն հաջորդ օրը այլ տեսք կունենա»։

ԱՄՆ նախագահ Դոնալդ Թրամփը հայտարարում է, որ ամերիկյան զինված ուժերը սկսել են լայնածավալ ռազմական գործողություն Իրանի դեմ։ Նրա խոսքով՝ գործողության նպատակը ամերիկացի ժողովրդի պաշտպանությունն է և «իրանական ռեժիմից բխող սպառնալիքի» չեզոքացումը։ Թրամփը ընդգծում է, որ Իրանը հրաժարվել է դադարեցնել իր միջուկային ծրագրերը՝ հավելելով, որ «Իրանը երբեք չի կարող ունենալ միջուկային զենք»։