Արաղչին Խամենեիի սպանությունը անվանել է միջազգային իրավունքի սկզբունքների դեմ հարձակում

Իրանի գերագույն առաջնորդ Ալի Խամենեիի սպանությունը Իսրայելի և Միացյալ Նահանգների կողմից միջազգային իրավունքի հիմնարար սկզբունքների վրա ուղղակի հարձակում է, ասվում է Իրանի արտաքին գործերի նախարար Աբբաս Արաղչիի՝ ՄԱԿ-ի գլխավոր քարտուղար Անտոնիո Գուտերեշին և ՄԱԿ-ի Անվտանգության խորհրդի անդամներին ուղղված նամակում։

«Միացյալ Նահանգները և Իսրայելի ռեժիմը միտումնավոր թիրախավորել են ՄԱԿ-ի ինքնիշխան անդամ պետության ամենաբարձրաստիճան պաշտոնյային՝ Իրանի Իսլամական Հանրապետության գերագույն առաջնորդ Ալի Խամենեիին։ Այս վախկոտ ահաբեկչական գործողությունը միջազգային իրավունքի հիմնարար սկզբունքների վրա ուղղակի հարձակում է»,-ասվում է ՄԱԿ-ում Իրանի առաքելության կողմից ՏԱՍՍ-ին տրամադրված նամակում։

Ավելին, Արաղչին նշել է, որ Իրանի բարձրագույն ղեկավարության միտումնավոր սպանությունը միջազգային իրավունքի կոպիտ խախտում է և բացում է «Պանդորայի արկղը»։

«Իրանի Իսլամական Հանրապետության ամենաբարձրաստիճան պաշտոնյայի միտումնավոր թիրախավորումը պետությունների միջև հարաբերությունները կարգավորող ամենահիմնարար նորմերի կոպիտ և աննախադեպ խախտում է։ Նման վարքագիծը անզգուշորեն բացում է վտանգավոր «Պանդորայի արկղը»՝ խաթարելով ինքնիշխան հավասարության հիմքերը և միջազգային համակարգի կայունությունը», - ընդգծել է Իրանի արտգործնախարարը։