Ռուսաստանում վաճառքի կհանվի Umo 5 էլեկտրական քրոսովերը

2026 թվականի ապրիլից Ռուսաստանի շուկայում կմեկնարկեն նոր կոմպակտ Umo 5 էլեկտրամեքենայի վաճառքները։ Ինչպես հայտնում է ТАСС-ը՝ հղում անելով արտադրողի պաշտոնական կայքին, քաղաքային երթևեկության և տաքսի ծառայությունների համար նախատեսված քրոսովերի մեկնարկային գինը կսկսվի 2,5 միլիոն ռուբլուց։

Մոդելը համալրված է ավելի քան 200 ձիաուժ հզորությամբ ուժային կայանքով, իսկ 0-ից 100 կմ/ժ արագացում իրականացվում է 8,5 վայրկյանում։ Մարտկոցի ամբողջական լիցքավորումը հնարավորություն է տալիս անցնել մինչև 420 կիլոմետր ճանապարհ, իսկ արագ լիցքավորման միջոցով 80 տոկոս լիցք կարելի է ապահովել ընդամենը 30 րոպեում։

Էլեկտրամեքենայի երկարությունը կազմում է 4535 մմ, առանցքների միջև հեռավորությունը՝ 2750 մմ։ Բեռնախցիկի տարողությունը, կախված հետևի նստատեղերի դիրքից, տատանվում է 405-ից մինչև 1200 լիտրի սահմաններում, իսկ ճանապարհային բացվածքը կազմում է 150 մմ։ Մոդելը համալրված է նաև գաջեթների համար անլար լիցքավորման սարքով և 14,6 դյույմանոց սենսորային մուլտիմեդիա էկրանով։ Փետրվարին «Մոսկվիչ» գործարանում մեկնարկել է Umo էլեկտրամեքենաների արտադրությունը, և տարվա ընթացքում նախատեսվում է թողարկել շուրջ երեք հազար միավոր։