Իրանի հրթիռներից հետո Ծոցի երկրները կանգնած են պատերազմի մեջ մտնելու երկընտրանքի առաջ

Իրանի հրթիռային հարվածներից հետո Դոհայի, Դուբայի և Մանամայի վրա ծխի սյուներ բարձրացան՝ կոտրելով ոչ միայն շենքերի ապակիները, այլև Պարսից ծոցի երկրների՝ կայուն և անվտանգ տարածաշրջանի իմիջը։ Ինչպես գրում է Al Jazeera-ն, տարածաշրջանի պետությունները կանգնած են բարդ ընտրության առաջ՝ պատասխան հարված հասցնել և վտանգել Իսրայելի հետ նույն ճամբարում ընկալվելը, թե՞ պահպանել չեզոքություն՝ վտանգելով սեփական հեղինակությունն ու անվտանգությունը։

Հարվածները տեղի են ունեցել այն բանից հետո, երբ ԱՄՆ-ն և Իսրայելը համատեղ լայնածավալ գործողություն էին իրականացրել Իրանի դեմ, որի հետևանքով սպանվել էր երկրի գերագույն առաջնորդ Ali Khamenei-ն և մի շարք բարձրաստիճան զինվորականներ։ Թեհրանը պատասխանել է հրթիռներով և անօդաչու սարքերով՝ թիրախավորելով Իսրայելի և ԱՄՆ ռազմական օբյեկտները Ծոցի երկրներում։ Տարբեր երկրներում կան զոհեր և տասնյակ վիրավորներ, վնասվել են օդանավակայաններ և կարևոր ենթակառուցվածքներ։

Վերլուծաբանների կարծիքով՝ Ծոցի համագործակցության խորհրդի երկրները չեն ցանկացել այս հակամարտությունը և մինչ վերջին պահը փորձել են միջնորդել Վաշինգտոնի ու Թեհրանի միջև։ Սակայն այժմ նրանք ստիպված են վերագնահատել իրենց ռազմավարությունը․ պատերազմին միանալը կարող է վնասել նրանց լեգիտիմությանը, իսկ պասիվ մնալը՝ թուլացնել անվտանգության և ինքնիշխանության մասին ձևավորված պատկերացումը։ Տարածաշրջանը, փորձագետների գնահատմամբ, մտնում է պետական մակարդակի բաց ռազմական բախումների նոր փուլ, ինչը կարող է արմատապես փոխել Մերձավոր Արևելքի ուժերի հավասարակշռությունը։