Թուրքիան Ինջիրլիքի ռազմաօդային բազայի վրա հարձակման մասին պնդումները հերքել է՝ որակելով դրանք կեղծ

Թուրքիայի նախագահի աշխատակազմի հաղորդակցության վարչության դեզինֆորմացիայի դեմ պայքարի կենտրոնը հայտարարել է, որ Ինջիրլիքի ավիաբազայի վրա հարձակման մասին պնդումները կեղծ են։

«Որոշ սոցիալական ցանցերում շրջանառվող պնդումները, թե «Թուրքիայում գտնվող ամերիկյան ռազմաբազան հարձակման է ենթարկվել», կեղծ են։ Թուրքիայում որևէ երկրի պատկանող ռազմական բազաներ չկան։ Թուրքիայի Հանրապետության օդային տարածքը, ցամաքային և ծովային տարածքը, ինչպես նաև նրա ռազմական օբյեկտները գտնվում են նրա ինքնիշխանության և վերահսկողության ներքո։ Մեր երկրի վրա հարձակումներ չեն եղել, և Թուրքիային տարածաշրջանային հակամարտությունների կողմ ներկայացնելու հաղորդագրությունները և այլ փորձերը ապատեղեկատվության հստակ ակտ են», - ասվում է կենտրոնի հայտարարության մեջ։

Կենտրոնը հավելել է, որ Թուրքիայի պաշտպանության և անվտանգության համակարգը լիովին գործում է, և համապատասխան հաստատությունները հետևում են գործընթացներին իրական ժամանակում։