Ումար Ջաբրաիլովի մարմինը կտեղափոխեն Չեչնիա, հուղարկավորությունը կկայանա Նովիե Ատագի գյուղում

Գործարար և Չեչնիայից Դաշնային խորհրդի նախկին սենատոր Ումար Ջաբրաիլովի հուղարկավորությունը կկայանա նրա ծննդավայրում՝ Չեչնիայի Նովիե Ատագի գյուղում։ Այս մասին հայտնում է РИА Новости-ն՝ հղում անելով ընտանիքին մոտ կանգնած աղբյուրին։

Աղբյուրի խոսքով՝ Ջաբրաիլովի մարմինը Կովկասյան հանրապետություն կտեղափոխվի մարտի 3-ի առավոտյան։ Ավելի վաղ հայտնի էր դարձել, որ վերջին շրջանում գործարարը վարել է մեկուսացված կենսակերպ և հազվադեպ է մասնակցել հանրային միջոցառումների։

Ջաբրաիլովի մահվան մասին տեղեկությունը հրապարակվել էր մարտի 2-ին։ Նրան հյուրանոցից տեղափոխել էին հիվանդանոց ծանր վիճակում, սակայն բժիշկներին չի հաջողվել փրկել նրա կյանքը։ Դեպքի վայրում հայտնաբերվել էր նաև 9 մմ տրամաչափի «Լյուգեր» տեսակի ատրճանակ։ Իրավապահները հայտարարել են, որ դեպքի մեջ քրեական տարր չեն տեսնում։ Միջադեպից մեկ օր առաջ Ջաբրաիլովը հրապարակել էր տեսանյութ՝ անդրադառնալով Իրանի և ԱՄՆ-ի միջև ռազմական լարվածությանը և մտահոգություն հայտնելով Մերձավոր Արևելքում էսկալացիայի կապակցությամբ։