Ռուսաստանում սկսվել է կենսատեխնոլոգիաների զարգացման իրավական դաշտի ձևավորումը. ՌԴ վարչապետ

Ռուսաստանի վարչապետ Միխայիլ Միշուստինը հայտարարել է, որ կառավարությունը սկսել է երկրում կենսատեխնոլոգիաների զարգացման համար անհրաժեշտ իրավական և կարգավորող հիմքերի մշակումը։ Համապատասխան հանձնարարականը տրվել է Ռուսաստանի նախագահ Վլադիմիր Պուտինի կողմից «Ապագայի տեխնոլոգիաներ» համաժողովի ընթացքում։ Այս մասին հայտնում է TASS լրատվական կայքը։

Միշուստինի խոսքով՝ արդեն սահմանվել են բնությանը մոտ տեխնոլոգիաների հետազոտության հիմնական սկզբունքներն ու չափորոշիչները, ինչպես նաև նախանշվել են այդ ոլորտի զարգացման առաջնահերթ ուղղություններն ու հեռանկարները Ռուսաստանում։

Վարչապետը նշել է, որ ծրագիրը բարդ և լայնածավալ է, սակայն դրա իրականացման համար Ռուսաստանն ունի անհրաժեշտ գիտական ներուժ և մասնագիտական կարողություններ։ Նրա գնահատմամբ՝ տեխնոլոգիական զարգացումն ու թվայնացումը նոր հնարավորություններ են ստեղծում տնտեսության և սոցիալական ոլորտի գրեթե բոլոր ճյուղերում, սակայն միաժամանակ մեծացնում են շրջակա միջավայրի ծանրաբեռնվածությունն ու բնական ռեսուրսների սպառումը։

Այդ պատճառով, ըստ Միշուստինի, անհրաժեշտ են բեկումնային լուծումներ, որոնք կօգնեն վերականգնել հավասարակշռությունը կենսոլորտի և տեխնոլոգիական միջավայրի միջև, ինչպես նաև նպաստել բնակչության առողջության ամրապնդմանը։