Օրմուզի ճգնաժամը փոխում է խաղի կանոնները․ Հնդկաստանը չի կարող հրաժարվել ռուսական նավթից

CNBC-ի գնահատմամբ՝ Իրանի շուրջ լարվածությունն ու Օրմուզի նեղուցում ստեղծված անորոշությունը Հնդկաստանի համար էներգետիկ լուրջ մարտահրավեր են դարձել։ Երկիրը իր նավթի պահանջարկի շուրջ 85 տոկոսը ծածկում է ներմուծմամբ, և նույնիսկ մի քանի դոլարով թանկացումը ծանր բեռ է տնտեսության համար։ Rystad Energy-ի փոխնախագահ Պանկաջ Շրիվաստավան զգուշացնում է՝ շուկայի ցանկացած ցնցում անմիջապես հարվածում է Նյու Դելիին, իսկ Transversal Consulting-ի ղեկավար Էլեն Ուոլդը նշում է, որ ժամանակահատվածը Հնդկաստանի համար չափազանց անհաջող է։

Խնդիրն այն է, որ BRICS-ի անդամ Հնդկաստանը վերջերս առևտրային համաձայնագիր էր կնքել ԱՄՆ-ի հետ, որի շրջանակում նախատեսվում էր աստիճանաբար հրաժարվել ռուսական նավթից։ Մատակարարումները փոխարինվել էին Մերձավոր Արևելքից ներմուծմամբ, սակայն Իրանի շուրջ զարգացումները կասկածի տակ են դրել այդ ուղու հուսալիությունը։ Միաժամանակ Վաշինգտոնը արդեն ակնարկում է հնարավոր պատժիչ մաքսատուրքերի մասին, եթե Նյու Դելին վերադառնա ռուսական նավթի գնումներին։ Այնուամենայնիվ, փորձագետները հենց այդ սցենարն են համարում առավել հավանական։

Օրմուզի նեղուցը, որը կապում է տարածաշրջանի խոշոր արտադրողներին՝ Սաուդյան Արաբիա, Իրան, Իրաք և Արաբական Միացյալ Էմիրություններ, համաշխարհային շուկաների հետ, ապահովում է համաշխարհային նավթային մատակարարումների շուրջ 20 տոկոսը։ Հնդկաստան ներմուծվող նավթի գրեթե կեսն անցնում է հենց այդ երթուղով։ Լիակատար արգելափակման դեպքում գները կարող են կտրուկ աճել՝ հասնելով անգամ 200 դոլարի մեկ բարելի դիմաց, ներառյալ ռուսական նավթը։