Պեկինը մեղադրում է ԱՄՆ-ին և Իսրայելին՝ համաշխարհային էներգետիկ անվտանգությունը խաթարելու համար

Չինաստանի արտաքին գործերի նախարարությունը մեղադրել է ԱՄՆ-ին և Իսրայելին Իրանի դեմ իրականացված հարվածներով միջազգային էներգետիկ անվտանգությունը խաթարելու մեջ՝ միաժամանակ կոչ անելով անհապաղ դադարեցնել կրակը։ Այս մասին հայտարարել է Չինաստանի ԱԳՆ պաշտոնական ներկայացուցիչ Մաո Նինը՝ հաղորդում է ՏԱՍՍ-ը։ Պեկինը ընդգծել է, որ Իրանի վրա հարձակված երկրները պարտավոր են ապահովել էներգակիրների կայուն և անխափան մատակարարումներ, ինչը կենսական նշանակություն ունի համաշխարհային տնտեսության համար։

Չինական կողմը նաև շեշտել է Օրմուզի նեղուցում անվտանգ նավարկության ապահովման անհրաժեշտությունը և զգուշացրել, որ հետագա լարվածությունը կարող է խորացնել բացասական ազդեցությունը համաշխարհային տնտեսության վրա։ Միաժամանակ, նավթի և գազի գները երկուշաբթի օրվանից կտրուկ աճում են։ Իրանի Իսլամական հեղափոխության պահապանների կորպուսի խորհրդական Իբրահիմ Ջաբարին հայտարարել է, որ ցանկացած նավ, որը կփորձի անցնել նեղուցով, որը Թեհրանը համարում է իր տարածքային ջրեր, կխոցվի։

ԱՄՆ զինվորականները, իրենց հերթին, չեն հաստատել Օրմուզի նեղուցի արգելափակման մասին տեղեկությունները՝ նշելով, որ այդ նեղուցով տեղափոխվող իրանական նավթի շուրջ 80 տոկոսը մատակարարվում է Չինաստանին, և մատակարարումների դադարեցումը վնաս կհասցնի հենց Պեկինին։ Սակայն տարբեր տվյալներով՝ Չինաստանի մասնաբաժինը նավթի ընդհանուր հոսքերում կազմում է մոտ 38 տոկոս, մինչդեռ ընդհանուր առմամբ ասիական երկրներին բաժին է ընկնում նեղուցով անցնող նավթի շուրջ 90 տոկոսը։