Գիտնականները հայտնաբերել են ուղեղի մետաստազների դեմ պայքարի նոր մեթոդ

Գիտնականները մշակել են գենետիկորեն ձևափոխված իմունային բջիջներ, որոնք կարող են ներթափանցել ուղեղ և ճնշել մետաստազների աճը։ Հետազոտության արդյունքները հրապարակվել են Nature Biomedical Engineering գիտական հանդեսում։ Խոսքը վերաբերում է ձևափոխված մակրոֆագերին՝ իմունային համակարգի բջիջներին, որոնք բնական պայմաններում ունակ են անցնել արյունաուղեղային պատնեշը։

Հետազոտողները մակրոֆագերին համալրել են խիմերային հակագենային ռեցեպտորով (CAR), որը թիրախավորում է մեզոտելին սպիտակուցը՝ բնորոշ մի շարք ուռուցքների, այդ թվում՝ թոքերի, կրծքագեղձի քաղցկեղի և մելանոմայի համար։ Բացի այդ, բջիջների կառուցվածքում ներառվել է MyD88 ազդանշանային մոլեկուլը, որը ուժեղացնում է հակաուռուցքային ակտիվությունը։ Ստացված բջիջները ստացել են CARMA անվանումը։

Նախակլինիկական փորձարկումների ընթացքում CARMA բջիջները կարողացել են անցնել արյունաուղեղային պատնեշը, կուտակվել ուռուցքային օջախներում և ոչնչացնել քաղցկեղային բջիջները ֆագոցիտոզի միջոցով։ Գիտնականների տվյալներով՝ ուղեղում մետաստազներ զարգանում են թոքերի, կրծքագեղձի քաղցկեղով և մելանոմայով հիվանդների շուրջ 30 տոկոսի մոտ, իսկ միջին գոյատևումը մեկ տարուց պակաս է։ Նոր մոտեցումը կարող է հիմք դառնալ ավելի արդյունավետ իմունոթերապիայի մշակման համար։