Saudi Aramco-ն որոնում է այլընտրանք Օրմուզի նեղուցին՝ նավթափոխադրումների համար

Աշխարհի խոշորագույն նավթային ընկերությունը՝ Saudi Aramco-ն, քննարկում է Օրմուզի նեղուցին այլընտրանքային երթուղիներ՝ ծովային նավթափոխադրումների համար։ Այս մասին հայտնում է Reuters-ը։ Որոշումը պայմանավորված է Իրանի կողմից նեղուցում նավարկության սահմանափակումներով և տարածաշրջանում անվտանգության սպառնալիքների աճով, ինչը հանգեցրել է նաև ապահովագրական վճարների կտրուկ թանկացման։

Փետրվարի 28-ին Իրանի Իսլամական հեղափոխության պահապանների կորպուսը հայտարարել էր Օրմուզի նեղուցով նավերի տեղաշարժի արգելքի մասին։ Ավելի ուշ պաշտոնական աղբյուրները նշել էին, որ արգելքը վերաբերում է միայն ամերիկյան զինված ուժերի հետ կապ ունեցող նավերին։ Ներկայումս Օրմուզի նեղուցը կարևորագույն ուղի է Պարսից ծոցի երկրներից նավթի և հեղուկացված բնական գազի արտահանման համար․ այստեղով անցնում է համաշխարհային մատակարարումների մոտ 20 տոկոսը։

Փորձագետների գնահատմամբ՝ նեղուցի փակումը կարող է նպաստել նավթի գների աճին և բացասաբար անդրադառնալ համաշխարհային տնտեսության վրա։ Միաժամանակ նշվում է, որ Պարսից ծոցի երկրներից հումք գնող որոշ պետությունների համար որպես այլընտրանք կարող է դիտարկվել նաև ռուսական նավթը։