Դատարանը տուգանել է Face-ին և արգելել զբաղվել կայքերի ադմինիստրացմամբ

Ուֆայում դատարանը հեռակա կարգով դատավճիռ է կայացրել ռուս ռեփեր Իվան Դրեմինի նկատմամբ, ով հայտնի է Face բեմական անունով։ Տեղեկությունը փոխանցել է Բաշկորտոստանի դատարանների միացյալ մամուլի ծառայությունը։ Երաժիշտը ՌԴ արդարադատության նախարարության կողմից ներառված է «օտարերկրյա գործակալների» ռեեստրում։

Դատարանը նրան մեղավոր է ճանաչել «Օտարերկրյա գործակալի գործունեության կարգի խախտում» հոդվածով և տուգանել 250 հազար ռուբլով։ Բացի այդ, Դրեմինը զրկվել է կայքերի ադմինիստրացման հետ կապված գործունեությամբ զբաղվելու իրավունքից՝ 2,5 տարի ժամկետով։ Ներկայումս նա գտնվում է արտերկրում և հայտարարված է դաշնային և միջազգային հետախուզման մեջ։

Քննությամբ պարզվել է, որ 2024-2025 թվականներին երաժիշտը սոցիալական ցանցերում հրապարակումներ է կատարել առանց «օտարերկրյա գործակալ» կարգավիճակը նշելու։ Ավելի վաղ հաղորդվել էր, որ Face-ին սպառնում է մինչև երկու տարվա ազատազրկում։