Իրանի շուրջ լարվածության ֆոնին դոլարը կտրուկ ամրապնդվել է

ԱՄՆ դոլարի ինդեքսը մարտի 3-ին աճել է մոտ 0,8 տոկոսով՝ մոտենալով 2025 թվականի ապրիլից ի վեր ամենամեծ երկօրյա աճին։Ինչպես հաղորդում է Bloomberg-ը, Իրանի շուրջ սրվող իրավիճակը մեծացրել է գնաճային սպասումները և խթանել պաշտպանական ակտիվների նկատմամբ պահանջարկը։

Վերլուծաբանների գնահատմամբ՝ դոլարի կտրուկ աճին նպաստել է նաև նավթի գների թռիչքը, որը պայմանավորված է Թեհրանի կողմից Օրմուզի նեղուցի փակմամբ։ Barclays-ի հաշվարկներով՝ նավթի գների յուրաքանչյուր 10 տոկոս աճը կարող է բարձրացնել ամերիկյան արժույթի արժեքը 0,5-1 տոկոսով։ Միևնույն ժամանակ նշվում է, որ եվրոյի և ֆունտի նկատմամբ բացված երկար դիրքերի կրճատումը ևս ազդել է այլ արժույթների թուլացման վրա։

Փորձագետները հիշեցնում են, որ նեղուցով նավթը հիմնականում մատակարարվում է ասիական երկրներին, մինչդեռ ԱՄՆ-ը շարունակում է մնալ նավթի արտահանող։ Սակայն Վաշինգտոնում արդեն զգուշացնում են «իրանական շոկի» հնարավոր հետևանքների մասին․ նախկին ֆինանսների նախարար Ջանեթ Յելենի կարծիքով՝ հակամարտության երկարաձգումը կարող է դանդաղեցնել ԱՄՆ տնտեսական աճը և արագացնել գնաճը։