Գիտնականները գտել են հիշողության վատթարացումը դանդաղեցնելու միջոց

Տասնամյակներ շարունակ երկբևեռ խանգարման բուժման համար կիրառվող լիթիումը կարող է դանդաղեցնել հիշողության վատթարացումը թեթև կոգնիտիվ խանգարում ունեցող տարեցների մոտ։ Այս եզրակացությանն են եկել Պիտսբուրգի համալսարանի գիտնականները։ Երկամյա կլինիկական հետազոտության արդյունքները հրապարակվել են JAMA Neurology գիտական հանդեսում։

Փորձարկմանը մասնակցել են 60 տարեկանից բարձր անձինք, որոնց մոտ առկա էին հիշողության թեթև խանգարումներ։ Մասնակիցները պատահականորեն բաժանվել են երկու խմբի․ մեկը ստացել է լիթիումի ցածր դոզաներ, մյուսը՝ պլացեբո։ Երկու տարվա ընթացքում գիտնականները պարբերաբար գնահատել են նրանց կոգնիտիվ գործառույթները, կատարել մագնիսառեզոնանսային տոմոգրաֆիա և ուսումնասիրել Ալցհայմերի հիվանդության հետ կապված կենսանշանները։

Հետազոտության ընթացքում պարզվել է, որ լիթիում ընդունող խմբում բառային հիշողության վատթարացումը տեղի է ունեցել ավելի դանդաղ, հատկապես այն մասնակիցների մոտ, որոնց մոտ նկատվել էր ամիլոիդ բետա սպիտակուցի կուտակում՝ Ալցհայմերի կարևոր ցուցանիշներից մեկը։ Միաժամանակ հեղինակները շեշտում են, որ լիթիումը չի վերականգնում արդեն կորցրած հիշողությունը, այլ հավանաբար դանդաղեցնում է դրա հետագա անկումը։ Գիտնականների գնահատմամբ՝ ցածր դոզաները եղել են անվտանգ և լավ են տրվել բժշկական հսկողության պայմաններում, սակայն հետազոտությունը փորձնական բնույթ ունի և պահանջում է լրացուցիչ ուսումնասիրություններ։